1142 nhoo dan adv

अयलाः शिशि ज्वनाः स्कुल वनीपिं मस्त

२०७२ आषाढ २१, सोमबार ०८:२८:१३

अयलाः शिशि ज्वनाः मस्त स्कुलय् वनी धइगु न्यनेबलय् आपालं अजू चायेफु । पर्वतया चित्रे–१ आडारेया पञ्चकोशी प्राथमिक विद्यालयया ब्वनीपिं मस्त धाःसा अयलाः शिशि ज्वनाः स्कुल वनेगु यानाच्वंगु दु ।

थथे अयलाः शिशि ज्वनाः स्कुल वनेगु हुनिं धाःसा मेता हे दु । गामय् म्हो गुणस्तरया अयलाः त्वनीपिं मिजंतय् ल्याः अप्वयेवं  थुकिया नियन्त्रणय् स्कुलया मस्तयसं सक्रियता क्यंगु खः । म्हो गुणस्तरया अयलाः सोफी, बटारे, खोइला, बिक्र थेंजाःगु अयलाखं उसाँय् स्यंकीगुलिं थुज्वःगु अभियान न्ह्याकागु स्कुलया शिक्षक मधुसोदन अधिकारीं धयादिल ।

थः अभिभावकपिंसं अयलाः त्वनेवं आर्थिकलिसे उसाँय् नं स्यनीगुलिं उज्वःगु लत त्वःतकेया निंतिं मस्त हे सक्रिय जुइमाःगु धासें अधिकारीं थुगु अभियानं अयलाः त्वनीपिं म्हो जुइगु भलसा कयादिल ।

आःतक स्कुलया मस्तयसं ५६ गः अयलाः शिशि स्कुलय् हयेधुंकूगु व सुनां यक्व शिशि हल वयात गांया हे अयलाःगुलुपाखें सिरपा बीगु घोषणा नं यानातःगु दु । गांया हे छम्ह अयलाःगुलुयात स्कुलय् सःताः उज्वःम्ह मचायात सिरपा बीकेगु योजना दुगु विद्यालयया प्रधानाध्यापक सुशीलादेवी गुरुङं जानकारी बियादिल । थुकिं अभिभावकयात हीनताबोध जुइगु अयलाः त्वःतेगु लकस दइगु भलसा कासें थुगु अभियानं अयलाः शिशिया नं नियन्त्रण भलसा कयातःगु दु ।