nepal life 2076 3 18

अमेरिकी सेना अफगानिस्तानया काबुलय् च्वंगु एअरपोर्टय् गोली त्वःतल

नेवा: अनलाइन न्युज – ललेन्द्र शाक्य | २०७८ श्रावण ३२, सोमबार १२:०३:५१

अफगानिस्तानया काबुलय् च्वंगु विमानस्थलय् अमेरिकी सेनां गोली चलेयाःगु दु । अन्तर्राष्ट्रिय समाचार एजेन्सी एएफपीया कथं सोमवाः विमानस्थलय् मुलुक त्वःतीपिनिगु भीड खनेदूगु अवस्थाय् अमेरिकी सेनां गोली चलेयाःगु खः ।

तालिवानं हाकनं अफगानिस्तानयात थःगु कब्जाय् कायेधुंकाः अफगानिस्तानं मनूत पिहाँ वनेत विमानस्थल थ्यंकूगु दु । अतिकं भीडया हुनिं आः काबुलया अन्तर्राष्ट्रिय विमानस्थल अस्तव्यस्त खनेदूगु दु ।

छम्ह प्रत्यक्षदर्शीं एएफपीलिसेया खँल्हाबल्हाय् धाःगु दु, ‘जितः थन यक्व हे ग्याःचिकु जुयाच्वंगु दु । आपालं हवाई फायर जुयाच्वंगु दु ।’

डेलिमेलया कथं काबुलया विमानस्थलय् गोली चलेजुइवं सैन्य उडानबाहेकया फुक्क उडान रद्द याःगु दु । आः विमानस्थलयात अमेरिकी सेनां सुरक्षा बियाच्वंगु दु । लिसें अमेरिकी सेनां अफगानिस्तानया एयर ट्राफिक कन्ट्रोलयात नं थःपिनिगु नियन्त्रणय् काःगु दु ।

बुखँय् न्ह्यथनातःकथं नेटोया छम्ह अधिकारीं सेनाया विमानबाहेक मेमेगु फुक्क व्यवसायिक उडान रद्द याःगु जानकारी ब्यूगु दु । नेटों विमानस्थलयात हाकनं संचालनय् हयेगु कुतः जुयाच्वंगु धाःगु दु ।

आः द्वलंद्वःया ल्याखय् अफगानी नागरिकपिं नं मुुलुक त्वःताः वनेत विमानस्थलय् थ्यंकूगु दु । सामाजिक संजालय् सार्वजनिक जूगु भिडियोय् विमानस्थलया गेटय् मनूतय्गु तःधंगु भीड खनेदु । सुं सुं यात्रुपिन्त उडान रद्द यायेधुंकाः विमानपाखें पिने छ्वयाहःगु खनेदु ।

अफगानी व्यवसायी सोएइब बाराकं थःत काम एयरया फ्लाइटं पिछ्वयाहःगु धाःगु दु । वया कथं विमानस्थलय् गोली चलेजुइधुंकाः उडान रद्द याःगु खः ।

Categorized in अन्तर्राष्ट्रिय