coved ad

अमेरिकी वैज्ञानिकया दावी : मंगल ग्रह दुने खनेदत अजूचायापूम्ह जीव

२०७८ मङ्सिर २९, बुधबार १४:२१:०३

अमेरिकी अन्तरीक्ष संस्था नासाया छम्ह वैज्ञानिकं मंगल ग्रहय् कीचा आकार खनेदुम्ह जीव खनेदूगु दाबी याःगु दु ।

मंगल ग्रहय् जीवन दूगु प्रमाण लुयावःगु वया दाबीइ नासाया मेपिं वैज्ञानिकपिं आश्वस्त जुइफयाच्वंगु मदुनि । अय्सां वं लिपांगु ईतक हे थः थःगु दाबीइ अडिग जुइगु व थःम्हं मंगल ग्रहय् कीचा आकारया प्राणी खनागु धाःगु दु ।

नासाया ९७ दँया वैज्ञानिक गिलवर्ट वी लेभिनया कथं व ४५ दँ न्ह्यः नासाया भाइकिंग मंगल यान मिसनया सुपरभाइजर खः, गुकिया नां लेबल्ड रिलिज एक्सपेरिमेन्ट खः । नासाया उगु मिसनया माध्यमं मंगल ग्रहया चाय् सुक्ष्म जीवपिन्सं त्वःतीगु ग्यासया जाँच याःगु खः ।

लेभिनं उगु इलय् हे सन् १९७६ या जुलाई २० स मंगल ग्रहया बल्ड रिलिज टेस्टया झ्वलय् मंगल ग्रहय् जीवनया सम्भावनाया प्रमाण लुयावःगु धाःगु खः ।

मंगल ग्रहया थीथी प्यंगू थासय् उगु प्रयोग याःगु खः व फुक्कसिगु लिच्वः छगू हे कथंया खः व पृथ्वीइ जुइगु परीक्षणलिसे पायछि मिलेजूगु खः । तर नासा उगु परीक्षणपाखें पूर्णरुपं सन्तुष्ट जुइमफुत ।

अयसां भाइकिंग मार्स प्रोबय् जडान यानातःगु मेगु यन्त्र भाइकिंग मोलिक्यूलर एनालिसिस एक्सपेरिमेन्टं मंगल ग्रहय् छुं नं जीव लुइके फूगु मदुनि । वधुंकाः नासां रिपोर्ट जारी यासें मंगल ग्रहय् वास्तवय् जीवन मदुगु धाःगु खः ।

मंगल ग्रहय् जीवनया अस्तित्व दूगु दाबी याःम्ह गिलवर्टया उगु इलय् हे कडा आलोचना जूगु खः । तर वं थःगु दाबी सही जूगु धयाः वयाच्वंगु दु । नासां लिपांगुखुसि मंगल ग्रहय् छ्वःगु क्युरोसिटी रोबरं तकं मंगल ग्रहय् कीचाथें जाःगु आकारया जीवया किपाः खिचेयाःगु वया दाबी दु ।