nepal life 2076 3 18

अमेरिका व तालिवानदथुइ कतारय् हाकनं वार्ता जुइगु

नेवा: अनलाइन न्युज – ललेन्द्र शाक्य | २०७८ मङ्सिर ८, बुधबार १७:११:१०

अमेरिका व तालिवानं हाकनं वार्ता याइगु जूगु दु । निगुलिं पक्षदथुइ वइगु वालय् कतारय् हाकनं वार्ता यायेत्यंगु खः ।

अमेरिकी विदेश मन्त्रालयया प्रवक्ता नेड प्राइसं मंगलवा निगुलिं पक्षदथुइ बैठक च्वनेत्यंगु व बैठकय् थःथःगु राष्ट्रिय च्यूताःया विषयस सहलह जुइगु जानकारी याकूगु दु ।

अफगानिस्ताया नितिं विशेष अमेरिकी प्रतिनिधि टोम वेस्ट नेतृत्वया पुचलं वइगु वाः ताइवानलिसे वार्ता यायेगु बुखँय् न्ह्यथंगु दु ।

अमेरिका व तालिवानदथुइ निवाःतक न्ह्याइगु वार्ताय् इस्लामिक स्टेट (आईएस–के) व अलकायदाविरुद्धया लडाइँ, अफगानिस्तानया मानवीय संकट, संकटग्रस्त अर्थतन्त्रबारे सहलह जुइगु टीआरटी वर्ल्डं जानकारी ब्यूगु दु ।

अथेहे, विगत २० दँ न्ह्यःनिसें अमेरिकाया नितिं ज्या याःगु अफगान नागरिक व अमेरिकीपिन्त काबुलं सुरक्षित कथं यंकेगु विषयस तकं सहलह जुइ ।

अमेरिकी विशेष दूत वेस्टं शुक्रवाः जक आर्थिक व कूटनीकि सहायताया नितिं तालिवान न्ह्यःने थःगु शर्त तःगु खः ।

वेस्टं आतंकवादविरुद्ध ल्वायेमाःगु, समावेशी सरकार नीस्वनेमाःगु, अल्पसंख्यक, मिसा व मचातय्गु अधिकार सम्मान यायेमाःगु व शिक्षा व रोजगारय् समान पहुँच बिइमाःगु थें जाःगु शर्त तःगु खः ।

Categorized in अन्तर्राष्ट्रिय