coved ad

अमेरिकाय् वःगु खुसिबालय् लानाः स्वम्ह नेपाःमि सीगु पुष्टि

नेवा: अनलाइन न्युज – ललेन्द्र शाक्य | २०७८ भाद्र १८, शुक्रबार १४:५९:४९

अमेरिकाया न्यूयोर्कय् समुद्री आँधी वयेधुंकाः वःगु खुसिबालय् लानाः स्वम्ह नेपाःमि सीगु दु । न्यूयोर्कया क्विन्स सहरय् च्वनाच्वंपिं छखा छेँया स्वम्ह दुजः नेपाःमिपिं सीगु न्यूयोर्क पोष्टं जानकारी ब्यूगु दु ।

बुखँय् न्ह्यथनातःकथं निदँया मचा लोबसाङ लामा, वया ४८ दँया मां मिङ्मा शेर्पा व ५० दँया अबु आङ गेलु लामा सीगु खः ।

बिहिवाः वःगु खुसिबाः इपिं च्वनाच्वंगु अपार्टमेन्टय् दुहाँ वयेधुंकाः इपिं कुंगु खः । इमि जलाखला डेबोराह टोरेसं धाःगु दु, ‘इपिं पिहाँ वयेगु असम्भव थें हे जूगु खः, छाय् धाःसा खुसिबाः जिगु पुलीतक वयेधुंकूगु खः, गुबले जि निगूगु तल्लाय् खः । आः क्वय् च्वंगु तलाय् छु जुल जुइ । छिं थः हे सोचेयाये फइ ।’

टोरेसं धाःगु दु, ‘थःगु अपार्टमेन्टय् लः दुहाँ वयेधुंकाः इमिसं छेँ थुवाःयात ग्वाहालिया नितिं आग्रह याःगु खः । तर, उकिया छुं मिनेटय् हे इमिगु फ्लोर लखं जायेधुंकूगु खः ।’

छेँ थुवाः नं इमित छुं ईलिपा पिहाँ वयेत सःतूगु खः तर इपिंपाखें छुं लिसः वमल । साढे ३ ता ईपाखे उद्धारकर्तां इमिगु सीम्ह लिकाःगु खः ।

मचा लोबसाङया शिक्षिका मार्था सुआरेजं धाःगु दु, ‘इमिगु छेँजः धात्थें न्ह्याइपुसे च्वंपिं बांलाःपिं खः । लोबसाङ छम्ह सुखी मचा खः ।’

Categorized in अन्तर्राष्ट्रिय