Header Nepal rastra bank Adv

अमेरिकाया वासिङटनय् ‘एमसीसी’या बोर्ड बैठक, नेपाः नं एजेण्डा

नेवा: अनलाइन न्युज – ललेन्द्र शाक्य | २०७८ मङ्सिर १७, शुक्रबार १४:१०:५८

अमेरिकाया वासिङटन डीसीइ च्वंगु मिलिनियम च्यालेञ्ज कर्पोरेसन (एमसीसी)या बोर्ड बैठक च्वनेत्यंगु दु ।

एमसीसीं सार्वजनिक याःगु बैठकया एजेण्डाय् नेपाःयात नं तःगु दु । नेपाःया संसदय् एमसीसी टेबल जुइमफयाच्वंगु इलय् वासिङटन डीसीइ च्वंगु मुख्यालय दुने बोर्ड बैठक सःतूगु खः ।

नेपाःया राजनीतिक दलत दथुइ तालमेल मिलेमजूबलय् संसदं एमसीसी पारित यायेगु प्रक्रिया अवरुद्ध जुयाच्वंगु दु । एमसीसी मुख्यालयं डिसेम्बर १४ स वासिङटनय् च्वनीगु बैठकय् नेपाल कम्प्याक्ट बारे सहलह जुइगु जानकारी ब्यूगु दु । एमसीसीबारे दलत विभाजित जुयाच्वंगु इलय् च्वनेत्यंगु बैठकं नेपाल कम्प्याक्टबारे महत्वं जाःगु निर्णय कायेफूगु जानकारी ब्यूगु दु ।

अमेरिकां एमसीसी अन्तर्गत ६० अर्ब तका दां अनुदान बिइगु धाःगु दु । एमसीसी कार्यान्वयन न्ह्यः संसदं पारित यायेमाःगु व्यवस्था जुइधुंकाः नेपाःया राजनीतिक दलत उकिया बारे विभाजित जूगु खः । अमेरिकां बिइगु धाःगु थ्यंमथ्यं ६० अर्ब तका दां नेपाःया उर्जा व सतक लिसेंया पूर्वाधार विकासय् छ्यलीगु धाःगु दु ।

तर एमसीसी कार्यान्वयन यायेत जूगु ढिलाइपाखें नेपाली जनता उकिया लाभ कायेगुपाखें बञ्चित जुयाच्वंगु एमसीसी मुख्यालयं धयाः वयाच्वंगु दु ।

बि.सं. २०७४ भाद्र २९ गते तत्कालीन अर्थमन्त्री ज्ञानेन्द्रबहादुर कार्कीं नेपाःया पाखें वासिङटन डीसीइ एमसीसी सम्झौताय् ल्हाःचिं तःगु खः ।

एमसीसीया उपाध्यक्ष फातिमा सुमार वंगु भाद्र २४ गते नेपाः वयाः संसदपाखें अनुमोदन जुइगुपाखें जुयाच्वंगु ढिलाइबारे शीर्ष नेतापिंलिसे सहलह ब्याकूगु खः ।

उगु इलय् उपाध्यक्ष फातिमालिसे राजनीतिक दलया शीर्ष नेतृत्वया दलीय सहमति कायम यानाः एमसीसी अनुमोदन यायेगु लिसः ब्यूगु खः ।

वधुंकाः दक्षिण व मध्य एसियाली मामिला स्वइम्ह अमेरिकी सहायक विदेशमन्त्री डोनाल्ड लु नेपाः वःगु खः । लु नं तकं नेपालं एमसीसी पास मयाःगु प्रति प्रधानमन्त्री लिसें शीर्ष नेतृत्वलिसे च्यूताः तःगु खः । वं नेपालं एमसीसी पास मयाःसां थःपिन्त छुं आपत्ति मजुइगु स्पष्ट यानाः अमेरिका लिहाँ वंगु खः । सहायक विदेशमन्त्री लु नं नेपालं एमसीसी पास मयाःसा उगु रकम मेथाय् यंकेगु धाःगु खः ।

थुखे नेपालय् नं वहे दिं राष्ट्रपति विद्यादेवी भण्डारीं निगुलिं सदनया बैठक आह्वान याःगु खः । सरकारं थ्व अधिवेशनय् एमसीसी प्रस्ताव न्ह्यःने यंकीगु सम्भावना दूगु सीदूगु दु ।

Categorized in अन्तर्राष्ट्रिय