coved ad

अमेरिकाया न्यूयोर्कय् खुसिबाः, आपतकाल घोषणा

नेवा: अनलाइन न्युज – ललेन्द्र शाक्य | २०७८ भाद्र १७, बिहिबार २३:३४:५३

अमेरिकाया न्यूयोर्क शहर तच्वकं वा वःगु हुनिं डुबानय् लाःगु दु । न्यूयोर्कय् आःतकया हे दकले तःधंगु वा वयेधुंकाः खुसिबाः वःगु खः । शहरय् खुसिबाः वयेधुंकाः आपतकाल घोषणा याःगु दु ।

न्यूयोर्कया मेयर बिल डे ब्लासिओं आः शहरं ऐतिहासिक मौसमी घटनाया सामना यानाच्वंगु धाःगु दु । वं आः न्यूयोर्कय् तःधंगु खुसिबाः खनेदूगु व सतक जोखिमपूर्ण अवस्थाय् दूगु धाःगु दु ।

सामाजिक संजालय् पोष्ट याःगु छुं छुं फुटेजय् न्यूयोर्कया सबस्टेशन, मनूतय्गु छेँय् खुसिबाः दुहाँ वंगु क्यनातःगु दुसा सतक नं जलमग्न जूगु दु ।

अथेहे, न्यूजर्सीइ नं आपतकाल घोषणा याःगु दु । न्यूजर्सीइ खुसिबाःया हुनिं कम्ती नं छम्ह मनू सीधुंकाः आपतकाल घोषणा याःगु खः ।

तच्वकं वा वःगु हुनिं न्यूयोर्कया आपालं सबवे बन्द जूगु दुसा आपालं रेल सेवा व हवाई उडान नं रद्द याःगु दु ।

हुरिकेन समुद्री आँधीया हुनिं न्यूयोर्क, न्यूजर्सी लिसेंया क्षेत्रय् आपालं वा वःगु खः । आइतवाः वहे आँधीया हुनिं लोउसियानाया द्वलंद्वः मनूतय्गु छेँय् बिजुली अवरुद्ध जूगु खः । आःतकं नं छेँय् विद्युत अवरुद्ध जुयाच्वंगु दु ।

अथेहे, न्यू ओर्लियन्सय् आः रात्रीकालीन कर्फ्यू तःगु दु । मौसमविदपिन्सं अझ नं आपालं वा वयेफूगु ख्याच्वः ब्यूगु दु । जलवायु परिवर्तनया हुनिं लिपांगु इलय् गनं खडेरी जुइगु व गनं अतिवृष्टि जुइगुथें जाःगु समस्या खनेदयाच्वंगु दु ।

Categorized in अन्तर्राष्ट्रिय