prabhu baink new

अमेरिकाया नौलो डिजिटल अडियो भिडियो सृजनाया निंतिं बाँलाःगु दबू जुइगु दाबी

नेवा: अनलाइन न्युज – विजयरत्न | २०७७ भाद्र २५, बिहिबार ११:१९:३२

अमेरिकाय् च्वनाः वयाच्वंपिं नेपाःमिपिं जानाः चायेकूगु डिजिटल प्लेटफर्म नेपाःया अडियो भिडियो सृजना ख्यःया निंतिं छगू बाँलाःगु दबू जुइ धकाः दाबी यानाहःगु दु । 

थ्वहे सेप्टेम्बर महिनांनिसें औपचारिक रुपं न्ह्याकुगु डिजिटल प्लेट फर्म नौलो डिजिटलया युट्युबय् नेपाः दुने वा नेपाःलिसे स्वापु दुगु सकतां कथंया हलंज्वलं दुथ्याकेगु खँ थ्व दबूया छम्ह हामा सुनिल माथेमा प्रधानं धयादीगु दु । सुनिल माथेमा प्रधान , शरद श्रेष्ठ व रोशन पुरी स्वम्ह जाना चायेकुगु थ्व युट्युबय् विशेष याना खस नेपाली भाषाया अडियो भिडियो हलंज्वलं दुथ्याकीगु ग्वसाः दुसा थुके अंग्रेजी भाय् वा मेमेगु भाय्या हलंज्वलं नं ईब्यः स्वया दुथ्याकीगु खँ थुकिया हामा प्रधानभाजुं कनादिल । 

कोरोना संक्रमणया कारणं संसारया फिल्मख्यः शुन्य अवस्थाय् लानाच्वंगु दुसा विशेष नेपाःया खस नेपाली फिल्मया स्वकुमिपिं आः या याकनं हलय् फिल्म स्वःवइगु अवस्था मदु धकाः धासें नौलो डिजिटलया प्रधानं थज्याःगु इलय् नेपाःया फिल्म संसारय् न्यंकभनं च्वनाच्वंपिं नेपाःमिया नापनापं मेमेपिं दथुइ थ्यंकेगु तातुनाः थ्व नौलो डिजिटलया शुरुआत यानागु खँ कनादिलसा थुकें फिल्म क्यना दुहाँ वःगु दामय् सर्जक वा निर्मातायात अप्वःसिबे अप्वः लबः बिइगु ग्वसाः दूगु खँ नं वयकलं न्ह्यथनादिल ।

नौलो डिजिटलया युट्युबय् फिल्म जक मखसे छुं नं कथंया म्युजिक भिडियो, टक प्रोग्राम, फेशन शो, रियालिटि शो, ईन्टरभ्यु लगायतया न्ह्यागु कथंया अडियो भिडियो सृजनायात थाय् बिइगु खँ नं नौलो डिजिटल सुत्रं जानकारी बिउगु दु । 

थुके थःथःगु सृजना दुथ्याकेगु मंदुपिन्सं थुकिया स्वम्ह हामा सुनिल माथेमा प्रधानयात ०१४४०५७०१०३२ , शरद श्रेष्ठयात ०१५७१२६५७६३९ व रोशन पुरीयात ०१७०३६२५७३२९ ल्याखय् भाइबर मार्फत  फोन याना स्वापू तयेत नं वयकपिन्सं इनाप यानादीगु दु ।

Categorized in कला