nepal life 2076 3 18

अफगानिस्तान हाकनं गृहयुद्धय् फसेजुइफु : इमरान खानया ख्याच्वः

नेवा: अनलाइन न्युज – ललेन्द्र शाक्य | २०७८ आश्विन ६, बुधबार १४:३३:२४

पाकिस्तानी प्रधानमन्त्री इमरान खानं समावेशी सरकार गठन मजूसा अफगानिस्तानय् हाकनं गृहयुद्ध चर्केजुइगु ख्याच्वः ब्यूगु दु ।

प्रधानमन्त्री खानं बीबीसीलिसेया छगू अन्तर्वार्ताय् वं धाःगु दु, ‘यदि इमिसं फुक्क समूहयात दुथ्याकेगु मयात धाःसा छुं नं ई गृहयुद्ध सुरु जुइ ।’

खानं गृहयुद्ध सुरु जूसा अफगानिस्तान अस्थिर व अस्तव्यस्त जुइगु धासें चिन्ता तकं प्वंकूगु दु । खानं धाःगु दु, ‘गृहयुद्धया अर्थ अफगानिस्तान अस्थिर, अस्तव्यस्त जुइगु व आतंकवादीया नितिं पायछिगु थाय् जुइगु खः । गुगु चिन्ताया विषय खः ।’

तालिवान नेतृत्वं छुं शर्तत पूवंकेधुंकाः जक थःपिन्सं इमिगु सत्तायात मान्यता बिइगु तकं खानं धाःगु दु । समावेशी सरकार गठन, मानवअधिकार व मिसा अधिकारया सम्मान याःसा जक न्हूगु सत्तायात पाकिस्तानं मान्यता बिइगु खानया धापू खः । खानं पाकिस्तानया सुरक्षायात खतरा ब्वलंकेफूगु आतंकवादीया नितिं अफगानिस्तान आश्रयस्थल जुइमज्यूगु पाखे नं तालिवान सजग  जुइमाःगु धाःगु दु ।

अथेहे, खानं अफगानी मिसा व मिसामचापिन्त शिक्षा हासिल यायेगुपाखें पनेगु ज्या गैर इस्लामिक जूगु धाःगु दु । तालिवानं आः नकतिनि मिसामचा व मचाल्यासेपिन्त विद्यालय वनेगुपाखें पनेधुंकाः खानं थुज्वःगु टिप्पणी याःगु खः ।

खानं मिसामचात याकनं हे विद्यालय वनेफइगु अवस्था ब्वलनीगुलि थः आशावादी जूगु नं धाःगु दु । खानं धाःगु दु, ‘सत्ताय् वयेधुंकाः तालिवानं ब्यूगु अभिव्यक्ति अतिकं उत्साहजनक जूगु दु । इमिसं मिसापिन्त विद्यालय वंके बिइ धैगु जिगु धारणा दु । मिसापिन्सं शिक्षा हासिल यायेमज्यू धैगु खँ इस्लाम अःखः जू । धर्मलिसे थुकिया छुं सम्बन्ध मदु ।’

संयुक्त राष्ट्रसंघया ७६ क्वःगु महासभाय् ब्वति कायेत न्यूयोर्क थ्यंकूम्ह पाकिस्तानी विदेशमन्त्री शाह महमूद कुरेशीं तकं समावेशी सरकार गठन, मानवअधिकार व मिसा अधिकारप्रति न्हूगु तालिवान सत्ता संवेदनशील जुइमाःगु धाःगु दु । थुगु विषयत सम्बोधन जुइधुंकाः जक अफगानिस्तानया न्हूगु सत्तायात अन्तर्राष्ट्रिय समुदायं मान्यता बिइगु कुरेशीया धापू खः ।

Categorized in अन्तर्राष्ट्रिय