नेवा: अनलाइन न्युज – ललेन्द्र शाक्य | २०७९ चैत्र ८, बुधबार १३:३८:३९

अफगानिस्तानया फैजावाद केन्द्रविन्दु जुयाः ब्वःगु भुखायया हुनिं कम्ती नं न्याम्ह मनू सीगु दुसा थ्यंमथ्यं ५० म्ह घाःपाः जूगु दु ।

मंगलवाः बहनी अफगानिस्तानया जर्म सहरसिबें थ्यंमथ्यं ४० किलोमिटर दक्षिण पूर्व केन्द्रविन्दु जुयाः ६.५ रेक्टरस्केलया भुखाय् ब्वःगु खः । भुखाय्या तच्वःगु झड्का अफगानिस्तनलिसें पाकिस्तान व भारतय् नं महसुस याःगु खः ।

विपद् व्यवस्थापन मन्त्री सफउल्लाह रहिमीं सीएनएनयात ब्यूगु जानकारी कथं अफगानिस्तानया लाघमन प्रान्तय् निम्ह सीगु व च्याम्ह घाःपाः जूगु दु ।

अथेहे, निम्ह मचातलिसें मेपिं स्वम्हेसिगु उत्तरी पाकिस्तानय् सीगु दु । मेपिं ४१ म्ह घाःपाः जूगु दु । पाकिस्तानया अब्बोटावाद सहरय् भुखायया हुनिं चलः कुतुंवनाः लँपु नं बन्द जूगु सीएनएनं जानकारी  ब्यूगु दु ।

भुखायया धक्का भारतया राजधानी नयाँदिल्ली, राजस्थान, जम्मु कश्मीरय् नं महसुस याःगु खः ।

उत्तर प्रदेशया पश्चिमी क्षेत्रया लिसें राजस्थानया जयपुर, सिकर, करौली लिसेंया जिल्लाय् नं भुखायया धक्का महसुस जूगु भारतीय मिडियां जानकारी ब्यूगु दु ।

भारतय् नं भुखाय् ब्वःगु महसुस जुइधुंकाः मनूत छेँ पिने पिहाँ वःगु खः । तर उकिं क्षति याःगु वा मयाःगु जानकारी वःगु मदुनि ।

Categorized in अन्तर्राष्ट्रिय