नेवा: अनलाइन न्युज – ललेन्द्र शाक्य | २०७८ आश्विन ११, सोमबार १२:२५:११

अफगानिस्तानया हेलमण्ड प्रान्तय् तालिवानं दारी चायेगुलि रोक तःगु दु । दारी चायेगु इस्लामिक कानूनया उल्लंघन जुइगु धासें तालिवानं दारी चायेगुलि रोक तयेगु निर्णय याःगु खः ।

तालिवानया धार्मिक प्रहरीं थ्व नियम पालना मयाइपिन्त सजाय बिइगु धाःगु दु । अफगानिस्तानया राजधानी सहर काबुलया सुं हमाजं नं थःपिन्त थुज्वःगु हे कथंया निर्देशन वःगु धाःगु दु ।

थ्व निर्देशनयात हे अफगानिस्तानय् तालिवानया पुलांगु शासन हाकनं लिहाँ वःगु रुपं थुइकूगु दु । थ्वसिबें न्ह्यः तालिवानं थुगु खुसिया तालिवानया शासन न्हापायाथें मजुइगु व कठोर कानून लागू मजुइगु धाःगु दु ।

थ्वसिबें न्ह्यः शनिवाः जक तालिवानं व्यवसायीया अपहरणय् दुथ्याःगु द्वपनय् प्यम्हेसित स्यानः इमिगु सीम्ह सार्वजनिक थासय् यःखाःगु बुखँ वःगु खः ।

थुज्वःगुलि तालिवानं हाकनं मेगु कडा कानून लगेयायेगु सुरु याःगु खः । हेलमण्ड प्रान्तया सैलुन पिने ख्याच्वःलिसेंया सुचं तिकाः सँ व दारी चायेगु विषयस शरिया कानून पालना यायेत निर्देशन ब्यूगु दु ।

काबुलया छम्ह सैलुन न्ह्याकाच्वंम्ह हजामं थःत नं तालिवानं फोन यानाः सँ चाकेबलय् अमेरिकी स्टाइल पालना मयायेत व दारी मचाकेत निर्देशन ब्यूगु धाःगु दु ।

Categorized in अन्तर्राष्ट्रिय