nepal investment baink

अफगानिस्तानय् आत्मघाती विस्फोट : २१ म्ह सित, इस्लामिक स्टेटं जिम्मा काल

नेवा: अनलाइन न्युज | ने.सं. ११४४ चिल्लाथ्व त्रयोदसी (२०८० चैत्र ९ गते) शुक्रवाः

अफगानिस्तानया कान्दहारय् आत्मघाती बम विस्फोटय् लानाः २१ म्ह मनूत सीगु दुसा ५० म्ह मल्याक घाःपाः जूगु दु ।

थ्व विस्फोटया जिम्मा इस्लामिक स्टेट (आईएसं) काःगु दु ।

अफगानिस्तानया दक्षिणी शहर कान्दहारय् च्वंगु न्यू काबुल बैंकया शाखा ज्याकुथिइ बिहिवाः बम बिस्फोट जूगु खः । उगु इलय् सेवाग्राहीपिनिगु भीड जुयाच्वंगु खः । आपालं सेवाग्राही तलब लिकायेत बैंकय् लाइन च्वनाच्वंगु खः । वहे इलय् आत्मघाती बम विस्फोट जूगु खः ।

बीबीसीया कथं तालिवान सरकारं थ्व घटनाय् स्वम्ह जक सीगु पुष्टि याःगु दु । तर बीबीसीं हे चिकित्सक स्रोतयात उदृत यासें २१  म्ह सीगु व कम्ती नं ५० म्हं मल्याक घाःपाः जूगु न्ह्यथंगु दु ।

विस्फोटय् लाःपिनिगु वासः कान्दहारया दकले तःधंगु अस्पताल मिरवाइसय् जुयाच्वंगु दु ।

बीबीसीं थ्व घटना थुगु दँया दकले तःधंगु विस्फोटया घटना जुइफूगु नं जानकारी ब्यूगु दु ।

कान्दहार तालिवान सत्ताया केन्द्र खः । तालिवानया सुप्रिम कमाण्डर थन हे च्वनीगु खः ।

Categorized in अन्तर्राष्ट्रिय