नेवा: अनलाइन न्युज – ललेन्द्र शाक्य | २०७७ फाल्गुण ९, आइतबार १७:२७:३६

अन्तर्राष्ट्रिय मातृभाषा दिवसया लसताय् नेवाः पत्रकार राष्ट्रिय दबूपाखें थौंया नेपालभाषा पत्रकारिता अन्तरक्रिया ज्याझ्वः  आइतवाः येँ सम्पन्न जूगु दु । 

नेवाः पत्रकार राष्ट्रिय दबूया छ्याञ्जे केके मानन्धरं न्ह्याकादीगु उगु ज्याझ्वलय् नेपालभाषा टाइम्सया सम्पादकया लिसें नेवाः पत्रकार दबूया सल्लाहकार लिसें सुरेश किरण मानन्धर मूपाहाँ कथं झायादीगु खःसा वयकलं नेपालभाषा पत्रकारिताया महत्व व  अवस्थाया विषयवस्तुयात कःघाना थःगु खँ तयादीगु खः । 

 नेवाः पत्रकार राष्ट्रिय दबूया वरिष्ठ न्वकु नृपेन्द्रलाल श्रेष्ठया संयोजकत्वय् न्ह्याःगु थुगु ज्याझ्वलय् थीथी वक्तापिन्सं मातृभाषाया पत्रकारिताया महत्वया विषययात कयाः थःथःगु खँ तयादीगु खः ।  उगु ज्याझ्वलय् सभानायःया थासं नेवाः पत्रकार राष्ट्रिय दबूया नायः सुरज वीर बज्राचार्यजुं थःगु  न्वचु बियादीगु खः । वयकलं थःगु न्वचुया झ्वलय् मांभाय्या माध्यमं पत्रकारिता याना दीपिन्त सुभाय् नं देछाया च्वना धयादिसें नेपालभाषाया माध्यमं जुयाच्वंगु पत्रकारिता व्यवसायिक जुया न्ह्याः वनेमाःगु खँय् नं बः बियादीगु दु । नापं झी नेवाःतय्त न्ह्याथाय् च्वंसां नं हाथ्यात दयाच्वंगु दु । उकिं हाथ्यायात चीका न्ह्याय्माःगु आवश्यकता नजं कनादिल । वयकलं नेवाः पत्रकार दबूपाखें न्ह्याकूगु खँनं कनादिसें  मातृभाषा सम्मेलन यानागु खँ नं उलादिल ।

उगु ज्याझ्वलय् रेडियोकःमि रचना श्रेष्ठं सुभाय् न्वचु बियादीगु खःसा नबीन जोशी, बिराज काजी राजोपाध्याय,मीना बज्राचार्य,सुरेन्द्रभक्त श्रेष्ठ लगायतया वक्तापिन्सं खँ तयादीगु खःसा सहभागिपाखें  प्रसान्त मालीं थःगु खँ तयादीगु खः । थुगु ज्याझ्वलय्   नेवाः पत्रकार राष्ट्रिय दबूया निवर्तमान नायः श्रीकृष्ण महर्जन, दबूया सल्लाहकार रमेश काजी स्थापित व विजयरत्न असंबरे लगायत  नेपालभाषाया छापा, रेडियो, अनलाईन, टिभी पत्रकारपिनिगु उपस्थिति दुगु खः ।