२०७७ आषाढ २, मंगलबार ०९:१२:३८

पृथ्वीइ दयेकूगु एक से एक उत्कृष्ट व अजूचायापूगु होटलतय्गु विषयस ला सकलसिनं न्यनातःगु हे खँ जुइ । गुलिखे होटल समुद्र क्वय् व गुलिखे होटल जमिन तःलय् तकं दयेकातःगु दु । तर थ्व फुक्क कथंया होटलतसिबें ब्यागलं कथंया होटल अमेरिकां अन्तरिक्षय् छगू होटल निर्माण यायेत्यंगु दु ।

खः, अमेरिकी अन्तरिक्ष संस्था नासां अन्तरिक्षय् होटल दयेकेगु तयारी याःगु दु । अन्तरिक्षया मध्यस्थानय् दयेकीगु अमेरिकी होटल छगू चीधंगु स्टुडियो अपार्टमेन्टथें जुइ । सन् २०२३ तकया दुने उगु होटलया निर्माण ज्या क्वचाइगु धाःगु दु ।

थुकिया नितिं नासां नर्थरोप ग्रुम्यान स्पेस नांया संयन्त्र दयेकूगु दु । उकिं अन्तरिक्ष यात्राया झ्वलय् बसोबास व बन्दोबस्तीया नितिं छगू गेष्ट हाउस निर्माण याइ । उगु होटल गेष्ट हाउसया नामं ह्याबिटेसन एण्ड लजिस्टिक आउटपोस्ट –ह्यालो) तःगु दु ।

उगु होटलं छखे चन्द्रमा व पृथ्वीया दथुइ च्वंगु अन्तरिक्षयानयात स्वाइगु केन्द्रया रुपं ज्या याइसा मेखे चन्द्रमाया परिक्रमा याइगु स्पेस स्टेशनय् वनीपिं अन्तरिक्ष यात्रीया नितिं बासस्थानया ज्या याइ ।

लुमंकेबहःजू, अमेरिकां सन् २०२३ निसें चन्द्रमाया अन्वेषणया नितिं चन्द्र कक्षय् चाःहिलीगु नासा गेटवे नांया स्पेस स्टेशनया पलिस्था याइ ।

अन्तरिक्षय् दयेकीगु उगु होटल चन्द्रमाया दिगो अन्वेषणया क्षेत्रय् महत्वपूर्ण कोशेढुंगा जुइगु नासाया अधिकारीपिन्सं जानकारी ब्यूगु दु । लिसें थुकिं मंगल ग्रहय् मनूत छ्वयेगु भविष्यया योजनातय् तकं ग्वाहालि याइगु विश्वास नासाया दु ।

नासां सन् २०२४ तकया दुने चन्द्रमाय् मनूत छ्वयेगु कथं आर्टेमिस नांया परियोजनाया सुरुवात याःगु दु । उगु योजना अन्तर्गत न्हापांगुखुसि चन्द्रमाय् छम्ह मिसा अन्तरिक्ष यात्री छ्वयेगु योजना नासाया दु ।

अन्तरिक्षय् दयेकीगु उगु होटलया लागत साढे १८ करोड डलर जुइगु धाःगु दु ।