zero media family planning adv

अनुसन्धान : भिटामिन डि...म्हो जूपिन्त कोरोना संक्रमण जुइगु आपालं सम्भावना

नेवा: अनलाइन न्युज – ललेन्द्र शाक्य | २०७७ श्रावण १४, बुधबार १६:५७:२८

कोरोना भाइरसया संक्रमण न्हियान्हिथं अप्वयाः वयाच्वंगु दु । थुकियात पूर्ण रुपं नियन्त्रण कायेगु कुतःत आःतक सुथां लायेफयाच्वंगु मदु ।

वैज्ञानिकपिं कोरोना भाइरस विरुद्धया खोप व वासः लुइकेगु ज्याय् व्यस्त जुयाच्वंगु दु ।

अथेला हलिमय् गुलि नं मनूत कोरोनापाखें लिच्वः लानाच्वंगु दु । वमध्ये आपालं लंकाः छेँय् लिहाँ वनेधुंकूगु दु । गुलिसिनं धाःसा कोरोनाया हे हुनिं ज्यान गुमेयायेधुंकूगु दु ।

आवश्यक सतर्कता छ्यःगु अवस्थाय् कोरोनाया जोखिमपाखें तापाक्क च्वनेफइ यानिकि बचे जुइफइ । अथेहे, ल्वय् प्रतिरोधी क्षमता उच्च जूपिं नं कोरोना संक्रमणया जोखिमय् मदु ।

अय्सां दीर्घ ल्वगिपिं, उच्च रक्तचाप, मधुमेह, मोटोपन, हृदय रोग, मिर्गौंला ल्वगि, क्यान्सर, क्रोनिज डिजिज आदिया समस्या दुपिन्त कोरोनाया अप्वः जोखिम दु ।

अय्सां आःया छगू न्हूगु शोध कथं कोरोनाया जोखिम उम्ह मनूयात अप्वः जुइ, गुम्ह मनूयाके भिटामिन डि...या कमी दु ।

भिटामिन डि व कोरोनादथुइ छु स्वापू दु ?

एलएचएस व एलरीली फ्याकल्टी अफ मेडिसिनया इजरायली शोधकर्ताया कथं भिटामिन डि...या कमी जुइबलय् कोरोना भाइरसया संक्रमण जुइगु जोखिम उच्च दु ।

भिटामिन डि...या कमीया संकेत

भिटामिन डि...या कमी जुइबलय् थकान अनुभव जुइ । क्वँय् स्याइगु महसुस जुइ । मांसपेशी कमजोर जुइ व स्याइ । चिन्ता व तनाव अप्वइ ।

भिटामिन डि...या स्रोत

भिटामिन डि...या प्राकृतिक स्रोत निभाःया जः खः । निभाःया जःपाखें झीगु म्हगः दुने भिटामिन डि...प्राप्त जुइ । उकिं न्हिथं कम्ती नं २० मिनेट निभालय् च्वनेबलय् भिटामिन डि...या पूर्ति जुइ । अथेहे, न्याँ, दुरु, ख्येँ, च्याउ थें जाःगु  नसाज्वलंपाखें नं भिटामिन डि प्राप्त जुइ ।

Categorized in अन्तर्राष्ट्रिय