nepal investment baink

अनियमित रुपं कम्ती नं निगू अर्ब ऋण ब्यूगु लुल : प्रहरी

नेवा: अनलाइन न्युज – ललेन्द्र शाक्य | ने.सं. ११४४ सिल्लागा तृतीया

तत्कालीन सेन्चुरी कमर्सियल बैंकया थीथी शाखापाखें कमसल धितो तयाः अनियमित रुपं कम्ती नं निगू अर्ब कर्जा प्रवाह जूगु लुयावःगु दु ।

केन्द्रीय अनुसन्धान ब्यूरो (सीआईबीं) याःगु अनुसन्धानया झ्वलय् स्वंगू कम्पनीयात कमसल धितो तयाः कर्जा प्रवाह याःगु लुयावयेधुंकाः बैंकया तत्कालीन प्रमुख कार्यकारी अधिकृत मनोज न्यौपानेलिसें झिम्हेसित गिरफ्तार यानागु ब्यूरोया एआईजी किरण बज्राचार्यं जानकारी ब्यूगु दु ।

सीआईबीया निर्देशक किरण बज्राचार्यया कथं, आः प्रभु बैंकय् डेपुटी सीईओ जुयाच्वंम्ह न्यौपानेलिसें बैंकया पूर्व सीईओ तुलसीराम गौतमयात नं गिरफ्तार याःगु दु ।

इपिंलिसें गिरफ्तारीइ लाःपिं मेपिं आः प्रभु बैंकय् ज्या यानाच्वंपिं कर्मचारीपिं दिलीप बराल, दिपेश प्रधान, रमण श्रेष्ठ व राजेश भण्डारी खः । गिरफ्तारीइ लाःपिं थप प्यम्हेसिगु नां खुलस्त याःगु मदुनि । थप मेपिं सुं सुं प्रहरीं मालाच्वंगु दु ।

अनुसन्धानय् दुथ्याःम्ह छम्ह अधिकृतया कथं, इमित कमसल धितोया आधारय् कम्ती नं निगू अर्ब तका दां बराबरया ऋण प्रवाह याःगु द्वपं लाःगु दु ।

साविकया सेन्चुरी बैंक प्रभु बैंकय् मर्ज जुइधुंकाः प्रभुबैंकय् ज्या यानाच्वंपिं कर्मचारीपिं गिरफ्तारीइ लाःगु खः । सेन्चुरीया तत्कालीन सीईओ गौतमं राजीनामा बिइधुंकाः न्यौपानें हे निमित्त सीईओया जिम्मेवारी काःगु खः ।

ताःईतक सीईओ मदुसां नं नेपाल राष्ट्र बैंकं सीईओ नियुक्त यायेत दबाब बिइधुंकाः बैंक संचालक समितिं न्यौपानेयात हे सीईओया भाला ब्यूगु खः ।

गिरफ्तारीइ लाःपिं विरुद्ध राष्ट्र बैंक ऐन अःखःया कसुर याःगु द्वपनय् अनुसन्धान व कारवाही प्रक्रिया न्ह्यःने यंकेगु ब्यूरोया एसपी होविन्द्र बोगटीं धाःगु दु ।

Categorized in दुर्घटना-अपराध