kmc bidya

अनामनगरया भाटभटेनी वडाध्यक्षया निर्देशन लिपा बन्द

नेवा: अनलाइन न्युज – ललेन्द्र शाक्य | २०७७ बैशाख ९, मंगलबार १४:२४:४५

येँया अनामनगरय् च्वंगु भाटभटेनी सुपरमार्केट बन्द जूगु दु । कोरोना भाइरस कोभिड १९ या संक्रमण ब्वलंके मबिइत मेमेगु चीधंगु पसःत बन्द जूसां नं भाटभटेनी धाःसा चालाच्वंगु खः ।

येँ महानगरपालिका वडा ल्याः २९ या वडाध्यक्ष कुश ढकालं भाटभटेनी बन्द याकेत निर्देशन ब्यूगु खः । न्हापां अटेरी याःसां नं सोमवाःनिसें धाःसा भाटभटेनी सुपरमार्केट बन्द जूगु वडाध्यक्ष ढकालं जानकारी ब्यूगु दु ।

चीधंगु पसःत फुक्क बन्द जूसां नं राजनीतिक पहुँचया आधारय् भाटभटेनी न्हिच्छि खुल्ला रुपं चायेकूगु खः ।

सुरक्षाया नितिं पिने दूरी कायम यायेत धाःसां नं दुने दुहाँ वनेधुंकाः धाःसा तःधंगु भीड जुइगु जुयाच्वंगु खः । दुने दूरी कायम यायेगु अवस्था मदूगु जूगुलिं संक्रमण ब्वलनीगु उच्च जोखिमय् दूगु धासें वडाध्यक्षं भाटभटेनी बन्द याकेमाःगु धाःगु दु ।

अनामनगरया भाटभटेनी बन्द जूसां नं नक्साल, कोटेश्वर लिसेंया थासय् धाःसा भाटभटेनी न्हिथं खुल्ला जुयाच्वंगु दु । संक्रमण ब्वलंके मबिइत धासें पिने लाइन तयाः दूरी कायम यायेत धाःसां नं दुने दुहाँ वनेधुंकाः भाटभटेनीं छुं सतर्कता मछ्यःगु वडाध्यक्षपिन्सं धाःगु दु ।

सामान्य नागरिकपिन्सं छ्यलीगु पसःत बन्द याकाः तःधंगु सुपरमार्केट जक चायेके ब्यूगु धासें सर्वसाधारणपिन्सं हे सामाजिक संजालय् विरोध यायेगु यानाच्वंगु दु ।

Categorized in बजाः