prabhu baink new

अनसनकारी डा. केसीया माग पूवन धाःसा छु जुइ ?

विजयकृष्ण श्रेष्ठ

- विजयकृष्ण श्रेष्ठ

डा. गोविन्द केसीं नेपालय् मेडिकल कलेजतय्त सम्बन्ध बी हे मज्यू धकाः धाःगु मदु । तर मेडिकल कलेजया नामं गुगु माफियातन्त्र न्ह्यानाच्वन, उकियात धाःसा तप्यंक हाथ्या ब्यूगु दु । थथे जुयाः थ्व सैद्धान्तिक हाथ्यासिकं तप्यंक हे व्यावहारिक हाथ्या जूवंगु दु, फुुक्कस्यां कपाः स्याःगु दु । 

मूलभूत खँ ला मेडिकल  शिक्षाया अति व्यापारिकरण व थुकिं हःगु विकृतिविरुद्ध वय्कःया मुहिम खनेदु । वय्कःया १० गू सूत्रीय मागया सार थथे दु ः

१)नेपालय् चिकित्सास शिक्षा नीति वयेमाल, चिकित्सा विश्वविद्यालय दयेकेमाल, अले तिनि सम्बन्धनया ज्या जुइमाल । 

२)आः सम्बन्धन बीगु ज्याया चलखेलय् संलग्न शिक्षामन्त्री, सभासद् चिकित्साशास्त्र अध्ययन संस्थान (आईओएस)यात कुचा थलेगु षडयन्त्र याःपिं, त्रिवि व केयू (काठमाडौं विश्वविद्यालय)या पदाधिकारीपिन्त कारवाही जुइमाल । 

३)सरकारी पहलय् ग्रामीण क्षेत्रय् मेडिकल कलेज निःशुल्क वा म्हो जक शुल्कय् चिकित्सा कोर्स ब्वंकेगु व्यवस्था जुइमाल ।

नेपालय् शिक्षा क्षेत्रय् जूगु व्यापारीकरणया हद दर्जा मेडिकल कलेज चायेकेगु सम्बन्धय् जुयाच्वंगु दु । चिकित्सा शिक्षा व्यापारी, नेता, सकसिगुं आकर्षणया खँ जूगु दु । थुज्वःगु अवस्थाय् गोविन्द केसीया धारणा धाःसा गुकी जुयाच्वंगु व्यापारीकरणयात दिकाः चिकित्सा सेवायात जनमुखी दयेकेगु खनेदु । थ्व बांलाःगु हे खँ खः । तर सम्बन्धन बीगु निंतिं सभासद्तय्गु तकं लबिङ जुल, संसदीय समिति निर्देशन बिल, प्रधानमन्त्रीं शिक्षा मन्त्रीयात व शिक्षामन्त्रीं त्रिभुवन विश्वविद्यालय चिकित्सा शास्त्र अध्ययन संस्थानयात निर्देशन बिल । चिकित्सा शास्त्र अध्ययन संस्थानया डीनं बोर्ड सःतूबलय् सम्बन्धन मबीगु निर्णय जसल । आः हानं अन दुने नं ‘लबिङ’ जुयाः थ्वहे बोर्ड हे निकू यायेगु कुतः जुयाच्वंगु दु । सायद थुकी दुने मनू न्यायेगु ज्या नं जुयाच्वंगु दयेमाः । छगूकथं मुक्कं राज्य संयन्त्र हे गोविन्द केसीया विरुद्ध लानाच्वंगु दु । सरकार वय्कःयात न्हापा जूगु सम्झौताया अःखः वंगु दु ।

उलि जक मखु, चिकित्सा शिक्षा नीतिया मस्यौदा यानाच्वंम्ह केदारभक्त माथेमायात मेगु हे थासय् पद बियाः ज्या छखे लाकेगु कुतः नं जुल । तर डा. गोविन्द केसीया अनसनयात स्वयाः हे वय्कलं उगु पद अस्वीकार यासें थःम्हं याकनं हे चिकित्सा शिक्षा नीतिया मस्यौदा क्वचायेकेगु धयादीगु दु ।