prabhu baink new

अधिवेशन यायेखंगुलिं अमेरिकाय् च्वनीपिं नेवाःपिनिगु सौभाग्य खः’ –सिजन श्रेष्ठ (खँल्हाबल्हा)

(सिजन श्रेष्ठ, १९६८ जनवरी २६ स साँखुइ जन्म जुया थौंकन्हय् अमेरिकाया बाल्टीमोर मेरिल्याण्डया नागरिक जुयाच्वनादीगु दु । वय्कः १९९४ निसें अन सिजन इन्टरप्राइजेजया प्रोप्राइटर जुयाच्वनादीगु दु । थीथी औद्योगिक व व्यावसायिक संघसंस्थाय् आवद्ध जुयादीम्ह भाजु सिजन श्रेष्ठ २०११ निसें २०१४ तक नेवाः अर्गनाइजेशन अफ अमेरिकाया प्रेसिडेन्ट जुयादी धुंकलसा २००८ निसें २०११ तक थुगु हे संस्थाय् जनरल सेक्रेटरी जुयादीगु खः । वय्कः नेपाः पासा पुचः अमेरिकाया १९९५ निसें आजीवन दुजः जुयादीगु खःसा वर्ल्ड नेवाः अर्गनाइजेशनया नं छम्ह दुजः खःसा आः नेवाः अर्गनाइजेशन अफ अमेरिकाया नं आजीवन दुजः खः । वय्कः छम्ह व्यापारी खःसा छम्ह समाजसेवी, भाषिक कार्यकर्ता नापनापं नेपालभाषा व नेवाः संस्कृतिया उत्थानया नितिं अमेरिकाय् च्वनाः स्यल्लाःगु कुतःया पलाः छिनाच्वनादीम्ह खः । वर्ल्ड नेवाः अर्गनाइजेशनया निक्वःगु अधिवेशन व भाजु सिजन श्रेष्ठया व्यक्तिगत खँयात कया गंगाबहादुर नेम्कुलं यानादीगु बःचाधंगु खँल्हाबल्हा थन न्ह्यब्वयाच्वना । सं.)

छि छम्ह व्यापारी, व्यापारीसिबें नं समाजसेवी लागाय् अप्वः क्रियाशील जुयाच्वनादीगु खनेदु, गथे खः ?

हजुर, जि छम्ह व्यापारी, सन् १९८८ पाखे हे भारतपाखें नेपाःन्यंकं व्यापार न्ह्याकूगु खः । जिं भारतं मोटरसाइकलया अटो पार्टस्, हेलमेटया व्यापार यानाः लिपा ताइवानय् व्यापार याना । लिपा जि १९९४ पाखे अमेरिका वना । अमेरिका छगू थुज्वःगु देस खः, अन वनीपिं न्ह्याम्ह नं मनूत सामाजिक ज्या मयाःसे च्वने हे फइमखु । अन छुं नं छुं कथंपाखें सामाजिक सेवाय् आवद्ध जुयाच्वंगु हे दइ । समाज सेवा यायेगु झ्वलय् रोटरी क्लब बाल्टीमोर, पासा पुचः अमेरिका, नेवाः अर्गनाइजेशन अफ अमेरिका, वर्ल्ड नेवाः अर्गनाइजेशनय् च्वनाः नेपालभाषा, नेवाः संस्कृति नापंया प्रचार प्रसार प्रबद्र्धन याना । रोटरी क्लबय् आवद्ध जुयाबलय् रोटरीया मू मर्म सर्भिस ओभर सर्भिस धइगु भावनां नुगलय् थिल । काय् १६ दँ दयेधुंकाः काय्यात नं सामाजिक ज्याय् दुथ्याकाः जिं । जिं सहकार्य यानाः दमौलीया नासीकय् सिटीगंगा हस्पिटलयात एम्बुलेन्स बिया । २००८ निसें जगतसुन्दर ब्वनेकुथि २७ म्ह नेपालभाषा कयाःतःपिं ब्वनामिपिन्त छात्रबृत्ति बिया । मानसिक उपचार केन्द्रयात ग्वाहालि यायेगु आज्जुं HEARTMIND INTERNATIONAL नीस्वनाः थुगु संस्थाय् जिनापं स्वम्ह विदेशी पासापिं नं दु । वय्कःपिनिगु नां BRANDON KOHRT (MD, PHD), ROBERT KOENIG, LIBBY MACFARLANE खः

सिजन जु, छि थौंकन्हय् वर्ल्ड नेवाः अर्गनाइजेशनया निक्वःगु अधिवेशनया नितिं लिमलाः, थ्व अधिवेशनया विषयस छुं धयादी ला थें ?

वर्ल्ड नेवाः अर्गनाइजेशन छगू थुज्वःगु संसथा ख, गुुगु संस्थाया पलिस्थां फुक्क नेपालीपिं व विशेष यानाः नेवाः समुदायपिन्त लसता बिइत ताःलाःगु दु । थुगु संस्थाप्रति सकलसिनं हे गौरव तायेकूगु दु । थुगु संस्थाया न्हापांगु अधिवेशन लण्डनय् जुल । आः जिपिं अमेरिकाय् च्वनीपिं नेवाःपिनिगु सौभाग्य खः कि थुगु निक्वःगु अधिवेशन जिमिसं यायेखंगुलिं । थुकिया अन्तरक्रियाय् जि भचा लिमलानाच्वंगु खः ।  जिमिसं अधिवेशनया नितिं बाल्टीमोरया नां चलेजूगु होटल शेराटनय् बुक यानागु खः । नेपाः नापं फुक्क हलिंपाखें वइपिं नेपाःमिपिन्त ब्वनापौ छ्वयागु खः । थःपिंसिबें अग्रज अर्गनाइजेशनया व्यक्तिपिं दयारत्न शाक्य व अर्गनाइजेशनया वर्तमान नायः बालगोपाल श्रेष्ठनापंया लिसे अधिवेशनया विषयस सहलह ब्याकागु दु । 

सिजन जु, छि न्हापां निसें हे अमेरिकाय् नेपाःया मौलिक संवत् नेपाल संवत् प्रचार प्रसार व प्रवद्र्धन यासें वयाच्वनादीम्ह व्यक्ति खः । थुगु अर्थय् वर्ल्ड नेवाः अर्गनाइजेशनया ज्याझ्वः नं महत्वपूर्ण रुपं कयादी जुइनि ?

हजुर, जिं नेपाःया मौलिक राष्ट्रिय संवत् नेपाल संवत्यात अमेरिकाय् नेपाल सरकार अमेरिकाया नितिं महामहिम नेपाली राजदूतयात मूपाहाँ कथं सःताः नेपाल संवत्या प्रचार प्रसारनापं नेपाःमिपिनिगु दथुइ छधी छप्पंया बल्लाःगु स्वापू तयेगु ज्या यायेगु कुतः जक यानागु खः । जिं थ्व ज्याझ्वः याये न्ह्यः थ्व संवत् खालि नेवाःतय्गु जक खः कि तायेकागु खः । सुं सुं पासापिं दथुइ आः थ्व समस्या म्हो जूगु दु । गथे नेपाल संवत्यात अमेरिकाय् समर्थन कायेखन अथेहे फुक्क नेपाःमिपिन्सं वर्ल्ड नेवाः अर्गनाइजेशनया निक्वःगु अधिवेशनयात ग्वाहालि याइ धकाः आशा व भलसा कयागु दु ।

सिजन जु, वर्ल्ड नेवाः अर्गनाइजेशनया थुगु अधिवेशनय् गुकथंया व्यक्तिपिन्सं ब्वति काइ ?

थुगु अधिवेशनय् सकल नेवाःतलिसें सकल नेपाःमिपिन्सं ब्वति काये फइ । थुगु अधिवेशनय् सहभागिता क्यनाः नेपाःया मौलिक नेवाः संस्कृति, नेपालभाषालिसें नेपाःया मौलिका राष्ट्रिय संवत् नेपालसंवतयात प्रबद्र्धन यायेगु ज्या जुइ । जिमिसं खुल्लारुपं सकलसित ब्वनापौ छ्वयागु दु । गनतक लगे जू, युरोप, अष्टे«लियानापं विकसित राष्ट्रय् च्वनाच्वंपिं नेपाःमिपिन्त छुं समस्या दइमखु जुइ । तर नेपालं ब्वति कायेत वइपिन्त भिषा प्रणालीइ चाहिँ छुं भच्चा थाकुइ फु । थुगु विषयस अर्गनाइजेशनं ग्वाहालि यायेगु पलाः छिनाच्वनागु दु ।

दकलें लिपा, छिगु व्यक्तिगतपाखें नेवाः अनलाइनन्युजपाखें छुं हसना दु कि ?

हजुर, दकले न्हापां, जि सिजनपाखें सकल नेपाःमिपिन्त न्हूदँ नेपाल संवत् ११३६ या लसताय् लिपालाःसां नं भिंतुना देछाया च्वना । जिं धाये चाहेजूगु जिगु नुगःया खँ छु धाःसा, विश्वय् च्वनाच्वंपिं सकल नेपाःमिपिन्सं थःगु मौलिकता, थःगु भाय्, थःगु संस्कार गुबलें नं ल्वःमंके मते । सदां सदां म्वाकाः तयेफयेमा । थुगु नेवाः अनलाइनन्युजं नं नेवाःख्यःया फुक्क पक्षयात कःघानाः हलिंन्यंकं प्रचारप्रसार यायेफयेमा, थ्वहे मनं तुना । सुभाय् ।