zero media family planning adv

अदालत व सेना झन् शक्तिशाली जुल

नेवा: अनलाइन न्युज – ललेन्द्र शाक्य | २०७७ फाल्गुण ११, मंगलबार १६:०२:२०

देय् प्रतिनिधिसभा विहिन अवस्थाय् लायेधुंकाः सर्वोच्च अदालत व सुरक्षा निकाय अतिकं शक्तिशाली जूगु दु । देसया राजनीतिक भविष्य हे अदालतया ल्हातय् थ्यंगु दु ।

सर्वोच्च अदालतं प्रतिनिधिसभा विघटनविरुद्ध लाःगु रिटय् याइगु फैसलां देसया राजनीतिक भविष्य निर्धारण याइ । उकिं बल अदालतया कोर्टय् थ्यंगु दु ।

प्रधानन्यायाधीश चोलेन्द्र शमशेर जबरा देसया दकले शक्तिशाली पात्र जूवंगु दु । वं छिइगु पलाखं देसयात छगू दिशा बिइफइगु जूवंगु दु ।

म्हिगः सोमवाः प्रधानन्यायाधीश चोलेन्द्र शमशेर जबरां प्रधानसेनापति पूर्णचन्द्र थापायात सर्वोच्च अदालतय् हे सःताः नापलाःगु दु । थ्व थःथवं हे छगू सन्देश खः । वं सेनापतियात सर्वोच्च अदालतय् सःताः नापलाःगुलिं सुरक्षा निकायलिसेया समन्वय धकाः थुइकेफु ।

सेनापति पूर्णचन्द्र थापां लिपांगु इलय् कडा अभिव्यक्तित बियाः वयाच्वंगु दु । जंगी अड्डां सीमा सुरक्षाय् नं सेनाया भूमिका मालेगु ज्या न्ह्याकाः हःगु दु । मेखे, सेना लिपांगु राजनीतिक घटनाक्रमप्रति अतिकं सजग जुयाच्वंगु खनेदु ।

सेनाया शक्ति अप्वःगु विषय रक्षामन्त्री ईश्वर पोखरेलया जिम्मेवारी प्रधानमन्त्री केपी शर्मा ओली स्वयं काःगुपाखें नं सिइकेफु । सेनापतिं तप्यंक प्रधानमन्त्रीलिसे ब्रिफिंग यायेत्यंगु खः व पूवन । उकिया लिसेलिसें फाष्ट ट्रयाकया ठेक्काय् सेनां धाःकथं धमाधम जुयाः वयाच्वंगु दु । ५० अर्ब लागतया ठेक्का निगू चिनियाँ कम्पनीयात बिइगु निश्चितप्रायः जुइधुंकूगु दु ।

राजनीतिक अस्थिरता अप्वयाः वंबलय् नेतात कमजोर जुजुं वनाच्वंगु दु । प्रधानमन्त्री केपी शर्मा ओली स्वयं कमजोर जुजुं वनाच्वंगु खनेदयावःगु दु । वं संवैधानिक निकायस नियुक्तिइ नं प्रधानन्यायाधीश चोलेन्द्र शमशेर जबरायात भागबण्डा यात । आः सेनाया चाहना नं धमाधम पूवंकेगु ज्या यानाः वयाच्वंगु दु ।

अदालत व सेना शक्तिशाली जुजुं वंबलय् प्रधानन्यायाधीश चोलेन्द्र शमशेर जबरा व प्रधानसेनापति पूर्णचन्द्र थापां सन्देश बिइगु कथं नापलायेगु ज्या याःगु दु । थुकिं देसय् शक्ति राजनीतिज्ञपाखें अदालत व सुरक्षा निकायपाखे केन्द्रित जुजुं वंगु खनेदु ।

Categorized in राजनीति