Newa Ekata Diwas Gosthi Adv

अदालतया निर्णय स्वीकार यायेगु जुइ : देउवा

नेवा: अनलाइन न्युज – ललेन्द्र शाक्य | २०७७ पौष २९, बुधबार १२:१४:५९

पूर्वप्रधानमन्त्री लिसें नेपाली कांग्रेसया सभापति शेरबहादुर देउवां अदालतयात स्वतन्त्र मानेयायेगु नीति दूगुलिं संसद् विघटनया मुद्दाय् सर्वोच्च अदालतं याःगु निर्णययात पार्टीं दुनुगलंनिसें स्वीकार यायेगु धाःगु दु ।

सिन्धुपाल्चोकया बाह्रबिसे नगरपालिकाय् च्वंगु पलाँतीइ ग्वसाः ग्वःगु फुटबल कासाया समापन समारोहयात सम्बोधन यायेगु झ्वलय् देउवां अदालत स्वतन्त्र निकाय जूगुलिं स्वतन्त्ररुपं निर्णय यायेदयेमाः धासें अदालतयात सतकं धम्की बिइगु ज्या पार्टीया नीति दुने मलाःगु स्पष्ट याःगु दु । कांग्रेस प्रजातान्त्रिक पार्टी जूगु न्ह्यथंसें संसद् पुनःस्थापना जूसां नं वा निर्वाचन जूसां नं पार्टी लिमचिलेगु धारणा देउवां तःगु दु ।

कांग्रेसया केन्द्रीय दुजःलिसें खेलकुद विभाग प्रमुख मोहनबहादुर बस्नेतं प्रधानमन्त्री केपी शर्मा ओलीं थःगु हे पार्टीया आन्तरिक कलहयात मिलेयायेत असफल जुइधुंकाः बहुमतया सरकार जूसां नं संसद् विघटन याःगु धाःगु दु ।

पूर्वमन्त्री बस्नेतं थः मांअबु कोमल माया व खड्या स्मृतिइ ग्वसाः ग्वःगु फुटबल कासाया फाइनल कासाय् मेलम्ची नगरपालिकायात शून्यया विरुद्ध छगू गोलं बुकाः सुनकोशी गाउँपालिका त्याःगु खः ।

सभापति देउवां न्हाप लाःगु पुचःयात १ लख ११ हजार १११ तका व ल्यू लाःगु पुचःयात ५५ हजार ५५५ व ट्रफी व पदक लःल्हाःगु खः ।

अथेहे, कासाय् उत्कृष्ट कासामि व म्यान अफ दी म्याचयात छसिंकथं २० हजार व ५ हजार तका दां लःल्हाःगु खः । थ्वहे पुस २२ गतेनिसें न्ह्याःगु उगु कासाय् जिल्लाया गुंगु (९) स्थानीय तह नं ब्वति काःगु खः ।

Categorized in कासा