prabhu baink new

अति न्ववाइपिं याकनं पलायन जुइ यः


सुनां कडा न्ववाइ, उपिं हे पलायन जुइगु संभावना यक्व दइगु जुयाच्वन । नेपाःया राजनीतिइ स्वयेगु खःसा छगू इलय् सु दकलय् अप्वः क्रान्तिकारी व गणतन्त्रवादी जुल उपिं हे लिपा वनाः राजतन्त्रवादी जूगु इतिहास दु । पंचायतकालय् जक मखुकि पंचायतया इलय् यक्व संघर्ष यानाः वंम्ह एमालेया नेतात मध्ये राधाकृष्ण मैनालीया पोष्चर छगू इलय् क्रान्तिकारी, झापा आन्दोलनया विद्रोही, हतियार ल्ह्वंम्ह नेता कथं म्हसियाच्वंगु खः । लिपा प्रजातन्त्र वयेधुंकाः एमालेया च्वय्या स्तरया नेता नं यक्व ई तक जुल, मन्त्री नं यक्व जुल, धेबा नं यक्व कमे यानाः नवधनाध्य नं जुल । लिपा ज्ञानेन्द्रं ०५९ सालय् सत्ता ल्हातय् काये धुंकाः राधाकृष्ण मैनाली जुजुया मन्त्रीमण्डलय् वनाः राजावादी जुयाः थःगु राजनीतिक जीवनया अन्त यात । आः हानं व हे मनू एमालेया नेता जूगु दु । थुकिइ आश्र्चय चाहे माःगु खँ ला मदु । छाय्कि उकथं राजावादी जूम्ह राधाकृष्ण मैनाली न्हापांम्ह नेता मखु । यदि ज्ञानेन्द्र सत्ता सफल जुयाः ताः ईतक राज्य न्ह्याःगु खःसा एमालेया वर्तमान नायः खड्ग ओलीनिसें कांग्रेस एमालेया यक्व हे नेतात राजावादी जुइधुंकूगु जुइ । धन्य माओवादी धाःगु पार्टी जनयुद्ध यानाः जुजु वान्छ्वया गणतन्त्र हया बिउगु थौंकन्हे उज्वःपिं नेतात परिवर्तनकारी व क्रान्तिकारीया ढोंग यानाच्वने दत । राजनीति धइगु इमिगु थौंकन्हे नवधनाध्य जुइगु लँपु जुयाच्वंगु दु ।

अख्तियार दुरुपयोग आयोगय् सूर्यभक्त उपाध्याय प्रमुख आयुक्त जूबलय् बाहेक अख्तियार दुरुपयोग आयोगं नं सुं हे राजनीतिज्ञयात अकूट सम्पत्ति छानबिन यायेगु आँट याःगु मदु । प्रमुख आयुक्त ला थौंकन्हे झन् दलीय नेतातय् चाटुकार जूगुलिं नेपालय् सायद हे राजनीतिज्ञया सम्पत्ति छानबिन यायेफुम्ह प्रमुख आयुक्तया सम्भावना मदु । अख्तियारं सुं हे नेतातय्त भ्रष्ट्राचारय् मज्वंगुया अर्थ थौंकन्हेया मन्त्रमण्डलया मन्त्रीत व राजनीतिज्ञतसें भ्रष्टाचार हे मयाः, अकूट सम्पत्ति हे ममुंकु धयागु मखु । यदि थौंकन्हेया नेतात गुपिं छयालिस साल धुंकाः छगू नं छगू सरकारी लाभ जुइगु पदय् च्वना वयाच्वंगु दु उमिसं उबले बिउगु सम्पत्ति विवरण व थौंकन्हेया सम्पत्ति विवरण जक लना स्वयेबलय् नं उमिगु अकूट सम्पत्ति स्रोत वैधानिक जुइ फइगु आधार गनं मदु । गथे एमालेया वर्तमान नायः खड्ग ओलीया सम्पत्ति विवरण एकाउन्न सालय् एमालेया अल्पमतया सरकार दुबले मन्त्रीमण्डलय् बिउगु दइ उबलेया सम्पत्ति विवरण व आःया सम्पत्ति लनास्वल धाःसा सम्पत्ति वैधानिक कि अवैधानिक धकाः अथें सीदइ । उकथंया वर्तमान सरकारया उपप्रधानमन्त्री व गृहमन्त्री वामदेव गौतम नं तःकःमछि मन्त्री, उपप्रधानमन्त्री जूगु दु । लोकेन्द्रबहादुर चन्द प्रधानमन्त्री जूगु इलय् वामदेव गौतम दकलय् न्हापां गृहमन्त्री जूगु खः । उबले वामदेव गौतम बिउगु सम्पत्ति विवरण आः सम्पत्ति विवरण जक लना स्वल धाःसा क्रान्तिकारी जनताया सेवक धाःपिं नेतात गुकथं नवधनाध्य जुल धइगु स्पष्ट जुइ । तर उज्वःपिं नेतातसें अवैधानिक कथं सम्पत्ति मुंकूसां उमित कारबाही याइगु निकाय लाचार जुयाच्वंगुलिं थ्व सरकारया मन्त्रीतसें खुल्लम खुल्ला भ्रष्टाचार यानाच्वन धकाः एमाले कांग्रेसया नेतातसें आरोप बियाच्वंगु दु ।

खँ क्रान्तिकारीताया अतिवादया खँ ल्हाइपिं गुकथं अन्तय् वनाः दक्षिणपन्थी विचारय् वनी धइगु बारे चर्चा यायेत्यनागु खः । राधाकृष्ण मैनाली जुजुया मन्त्रीमण्डलय् वनाः थःगु राजनीतिक चरित्रय् हाकः किकू थें आदिवासी जनजातिया मसिहा कथं म्हसिउम्ह खोरेबहादुर खपांगी नं अन्तय् वनाः थः नं यानाःगु राजनीतिक योगदानया वापत आदिवासी जनजातिया मुद्दायात ध्याकुने तयाः तत्कालिन जुजु ज्ञानेन्द्रया प्राथमिकताय् मलाःगु महिला मन्त्रालयया मन्त्री जू वन । उबलेनिसें खपांगीयात आदिवासी जनजाति आन्दोलनय् स्वयेगु दृष्टिकोण हे अवसरवादी कथं म्हसील व खपांगी अध्यक्ष जूगु राष्ट्रिय जनमुक्ति पार्टी वर्खास्त जुयाः जनजाति आन्दोलनं तापाये माल । खय्तला वय्कः थौंकन्हे मोटरसाइकलया ठक्कर नयाः अशक्त जुयाः विरामी जुयाच्वंगु यक्व दयेधुंकल । मखु धइगु खःसा खपांगी छम्ह उज्वःम्ह व्यक्तित्व खः गुम्ह आदिवासी जनजाति आन्दोलनयात राजनीतिक मुद्दाया रुपय् यंकेगु न्ह्यलुवाः जूम्ह व्यक्ति खः । थौंकन्हे वय्कः विरामी मजूगु खःसा वय्कलं छगू इलय् जिन्दगीभर दशैं (मोहनी व दशैं पाः)या सिन्हः मतीम्हं, ज्ञानेन्द्रया मन्त्री जुइवं थःगु जिन्दगीभरया सैद्धान्तिक मान्यतायात तिलान्जली बियाः राजायाथाय् वनाः मन्त्री जू वनेगु सिन्हः तिउ मवंगु खःसा राष्ट्रिय आदिवासी जनजाति आन्दोलनया कमाण्डर पद्मरत्न जू थें गोरेबहादुर खपांगी उपकमाण्डर जुइत लायकम्ह व्यक्ति खः ।

न्हापा जुजु दुबलय् जुजुया शक्ति दुबलय् थःयात क्रान्तिकारी, परिवर्तनया मसिया कथं क्यनीपिं छुं नेतात दक्षिणपन्थी धारय् वनाः राजावादी जू वं थें थौंया इलय् जुजु मदयाः गणतन्त्र वये धुंकूगु अवस्थाय् थुकथं परिवर्तनकारी धकाः क्यनीपिं दक्षिणपन्थी जुइ माल धाःसा कांग्रेस वा एमाले हे जू वनीगु खः । म्हिगः जुजुं न्ववाइगु राष्ट्रवादया वकालत थौंकन्हे एमालेया केपी वामदेव वा कांग्रेसया छुं नेतातसें यानाच्वंगु जूगुलिं दक्षिणपन्थी व यथास्थितिवादया प्रतिनिधित्व थ्व हे दलं याइगु स्वभाविक जुल । जुजुया सक्रियता दुगु इलय्, राजतन्त्र दुगु इलय् कांग्रेस कम्युनिष्ट तुलनात्मक रुपय् प्रगतिशील जुयाच्वंगु खः तर गणतन्त्रया घोषणा धुंकाः उपिं प्रगतिशील जुइमाःगु वाध्यता मन्त व यथास्थितिवादं हे उमिगु कल्याण जुइगु तायेकल । थ्व हे जुयाः परिवर्तनया माग यानाच्वंपिं धइगु थौंकन्हे आदिवासी जनजाति, मधेसी, दलित लगायत उत्पीडित समुदायया अधिकारया खँ ल्हाइपिं समुदाय व राजनीतिक दलत खः । तर थ्व हे समुदायया अधिकारया चर्को खँ ल्हाइपिं न्हापां जुजुवादी जू वं थें थौंकन्हे एमाले कांग्रेस जुयाः गुगु धरातलं थःपिसं राजनीति यानागु खः, गुगु धरातलया सैद्धान्तिक मान्यता ज्वनाः थःपिसं राजनीति यानागु खः व धरातलयात धोका बियाः वनेगु थाय् धइगु कांग्रेस एमाले हे खः । थुकथं वंपिं मध्ये छम्ह विजय सुब्बा गुम्ह न्हापाया संविधान सभाया इलय्, सङ्घीय समाजवादी पार्टी गठनया इलय् राज्य सत्ताय् कब्जा यानाच्वंपिं पहाडी छपुचः खस आर्य नेतातय्गु तच्वकं ब्वःबिम्ह धायेगु खःसा आदिवासी जनजाति अधिकारया नितिं सङ्घीय समाजवादी पार्टी दकलय् चर्को न्ववाइम्ह नेता खः तर अन्तय् वयाः व हे मनू एमाले तुं लिहाँ वंगु धइगु राजतन्त्रया इलय् क्रान्तिकारीत जुजुवादी जुया अवसरवादी चरित्र क्यं थें जक खः । थुकथंया हे चरित्र थौंकन्हे आदिवासी जनजाति महासंघया अध्यक्ष नागेन्द्र कुमाल व महासचिव पेम्बा भोटें नं क्यनाच्वंगु दु । उपिं निम्हं कांग्रेस व एमालेपाखें सभासद जुयाः जनजाति आन्दोलनं प्राप्त जूगु हाइट यात बामलाक दुरुपयोग यानाः नवदक्षिणपन्थी लँपुइ गुकथं आत्मसमर्पण यात धकाः क्यनाच्वंगु दु ।

थ्व हे जुया धात्थें धायेगु खःसा आदिवासी जनजाति महासंघया थ्व निम्ह नेतात थौंकन्हे आदिवासी जनजाति आन्दोलनया भिलेन कथं म्हसिया वयाच्वंगु दु । थ्व हे जुया उमिगु विरोध जुयाच्वंगु खः । थःगु अधिकारया नितिं आन्दोलन बाहेक मेगु विकल्प मदुगु इलय् आदिवासी जनजाति आन्दोलनयात विभाजित यानाः राजावादी जूपिं क्रान्तिकारीतसें राजाया तावेदारी याःथें कांग्रेस एमालेया तावेदारी यानाच्वन धकाः बिउगु आरोप गलत थ्यंक मखु । आदिवासी जनजातिया अधिकार नितिं आन्दोलन धइगु स्पष्ट हे जू व आन्दोलन कांग्रेस एमालेया विरुद्ध खः । व हे जुया आदिवासी जनजातियात अधिकार बिइगु खँ वलकि कांग्रेस एमालेया नेतातसें थ्व देय्यात कुचा थले बिइ मखु धकाः विषयान्तर यानाः आदिवासी जनजाति मधेसी आन्दोलनकारीतय्त विखण्डनवादी कथं प्रस्तुत यायेगु कुत यानाच्वंगु । जुजुं मन्त्री दयेका जुजुया हे विरोध याये मछिं थें जनजाति महासंघया नेतातसें छु ख्वालं आदिवासी जनजाति आन्दोलन यायेगु ? व हे जुया महासंघ थौंकन्हे आन्दोलनय् वने म्वायेकेगु नौटंकी यानाः नागेन्द्र कुमाल व पेम्बा भोटें थःगु व्यक्तिगत स्वार्थया नितिं महासंघयात आन्दोलनय् मयंकेगु खेल म्हिताच्वंगु खः ।

तर इतिहासय् थःगु धरातल त्वःताः आत्मसमर्पण याःपिं छुं ईया नितिं शक्तिशाली जूगु तायेफु तर उज्वःपिं व्यक्तित अन्तय् वनाः कलंकित जूगु इतिहास जक दु ।

(च्वसु च्वमिया निजी विचाः खः – सम्पादक)