coved ad

अज्ञात ल्वचं भारतया उत्तर प्रदेशय् ५० म्हसिबें अप्वः सित

नेवा: अनलाइन न्युज – ललेन्द्र शाक्य | २०७८ भाद्र १६, बुधबार १६:१६:०३

भारतया उत्तर प्रदेशय् अज्ञात ल्वचं ५० म्हसिबें अप्वः मनूत सीगु दु । सीपिं आपालं मचात दु ।

अन्तर्राष्ट्रिय संचारमाध्यमया कथं उच्च ज्वरो वइगु व आपालं चःति वइगुथें जाःगु समस्या खनेदूगु दु । इपिमध्ये आपालं ल्वगिपिन्त छ्यं स्याइगु, म्हगलय् लःया कमी जुइगु व वाकवाकी वइगुथें जाःगु समस्या खनेदूगु धाःगु दु । सुं सुं ल्वगिपिनिगु ल्हाः व तुतिइ फ्वतः फ्वतः वइगु समस्या खनेदूगु खः ।

उगु अज्ञात ल्वचं यानाः आः सलंसः मनूत अस्पतालय् भर्ना जूगु दु । उत्तर प्रदेशया पूर्वी खुगू जिल्लाय् थुकिया प्रकोप ब्वलंगु बुखँय् धाःगु दु । आःतक थ्व समस्याया हुनिं सीपिं सुयाके नं कोरोना भाइरस कोभिड १९ या संक्रमण धाःसा पुष्टि जूगु मदु । आः नकतिनि जक भारत कोरोनाया निगूगु लहरपाखें बुलुहुँ पिहाँ वयाच्वंगु अवस्थाय् उत्तर प्रदेशय् मेगु प्राणघातक ल्वय् खनेदूगु खः ।

थ्व समस्या खनेदूगु जिल्लाया डाक्टरपिन्सं सीगुया हुनि पतिं न्याःगुपाखें सरेजुइगु डेंगुया संक्रमण जुइफूगु धाःगु दु । इमिगु कथं अस्पताल वइपिं मूतय्गु हिइ प्लेटलेटया मात्रा अतिकं म्हो खनेदूगु धाःगु दु । थ्व लक्षण डेंगुया ल्वगिपिंलिसे नं पायछि जू ।

मिसाम्ह पतिं न्यातकि सरेजुइगु डेंगु ल्वय् हलिंया सच्छिं मल्याक्क आपालं देसय् खनेदयेधुंकूगु दु । तर, थुकिया ७० प्रतिशतसिबें अप्वः संक्रमित एसियाय् लुयावःगु दु । मचातय्के थ्व ल्वय्या जोखिम दकले अप्वः दु ।

Categorized in अन्तर्राष्ट्रिय