nepal lifef 2076 8 8

किड क्वीन नेपाल ट्यालेन्ट शो क्वचाल

नेवा: अनलाइन न्युज | २०७६ मङ्सिर १५, आइतबार १५:३१:०५

नेप्लीज फेसन होमं ग्वसाः ग्वयाः वयाच्वंगु मिसामचा व मचाल्यासेपिनिगु सौन्दर्य व प्रतिभा न्ह्यब्वयेगु कासा ‘किड क्वीन नेपाल–२०१९’या कासामिपिन्सं थःथःगु प्रतिभा न्ह्यब्वःगु दु ।

शनिवाः येँया प्रज्ञा भवनय् ग्वसाः ग्वःगु ट्यालेन्ट शोललय् २२ म्ह कासामिपिन्सं थःथःगु प्रतिभा न्ह्यब्वःगु खः ।

कासाय् सहभागी येँया थीथी स्कूलय् ब्वनाच्वंपिं मिसामचात व मचाल्यासेपिं मध्ये आपालंसिनं ट्यालेन्ट शोलय् हुलाप्याखं न्ह्यब्वःगु खःसा सुं सुं कासामिपिन्सं म्ये हाःगु खः ।

कासामिमध्ये इलिजा गुरुङं गुरुङ भाषाया हे म्येय् हुलाप्याखं न्ह्यब्वःगु खःसा अभिश्री तिवारीं नेपालभाषाया म्येय् हुलाप्याखं न्ह्यब्वःगु खः ।

अथेहे, निमिषा श्रेष्ठं खस नेपाली भाषाया म्येय् हुलाप्याखं न्ह्यब्वःगु खःसा सुप्रिया तामाङं जीवनया विषयस थःगु न्वचू तःगु खः । ज्याझ्वलय् अदिष्टा भण्डारीं म्ये न्यंकूगु खःसा राषु पन्तं पियानोवादन न्ह्यब्वःगु खः ।

अथेहे मेमेपिं कासामिपिं मध्ये सान्भी बाँनिया, मनिषा राई, सुप्रिया विष्ट, प्रकृना प्रधानाङ्ग, प्रँची किबानायो, स्नेहा प्रजापति, कृष्मा ढुंगाना, श्रेया जरेजु, रोषिका लामा व सरु खोटुजुं थीथी म्येय् हुलाप्याखं न्ह्यब्वःगु खः ।

स्नेहा रजकं धाःसा कराँते कासाया थीथी कौशल न्ह्यब्वःगु खःसा निशा विक नं थःगु हे ल्हाःतं थाःगु फेन्सी ब्याण्ड न्ह्यब्वःगु खःसा रितिका थापां गायन न्ह्यब्वःगु खः । अथेहे, आयुषा वाइवा म्येय् नाट्य न्ह्यब्वःगु खः ।

प्राध्यापक डा. विमला शाक्यया सभापतित्वय् क्वचाःगु ट्यालेन्ट शोलय् कराँते प्रशिक्षक अशोक श्रेष्ठ, मेकअप आर्टिष्ट मञ्जु कार्की पाण्डे, संचारकःमि अरुणा भट्टराई, व्यवसायी रोशन सायमि, विज्ञापन व्यवसायी संजय श्रेष्ठ, फेसन उद्यमी एलिना तुलाधर लिसेलिसें निर्णायकपिं च्वनादीगु खः ।

यल महानगरपालिकाया वडा ल्याः २१ इा वडाध्यक्ष रविन्द्र महर्जनया मूपाहाँसुइ क्वचाःगु उगु कासां मचात व मचाल्यासेपिंके आत्म विश्वास अप्वयेकेगु, व्यक्तित्व विकास याकेगु, वतृत्व कलाया विकास याकेगु आज्जु काःगु ग्वसाः खलः संस्थाया निर्देशक हेमा मानन्धरं जानकारी बियादीगु दु ।

वहे झ्वलय् नेप्लीज फेसन होमं पिंगु नेपाल संवत ११४० या नगुमा (क्यालेन्डर) तकं सार्वजनिक याःगु खः ।

Categorized in कला