chetrapa55

“जीवनय् आः वयाः छेँ छखा दने मफुत धैगु मनय् वं ”– भृगुराम श्रेष्ठ

नेवा: अनलाइन न्युज | २०७६ आश्विन ४, शनिबार १५:०४:०५

भृगुराम श्रेष्ठ
जितः अझ नं जि ८४ दँ दुम्हथें मच्वंनि । खः, कन्हय् शनिवाः जि ८४ दँय् च्वनी । जिगु निक्वःगु जंक्व खःसा नं जिं काय्पिन्त जंक्व यानाच्वने म्वाःल धकाः धयागु खः । न्हापांगु जंक्वः बांलाक्क हे यानाः बिइधुंकल । आः हानं भुखाय् भिखाय् ब्वयाः समस्या जुयाच्वंगु इलय् जंक्व जिंक्व यानाच्वने म्वाःल धया । अय्सां कन्हय् श्रीघः ज्ञानमालां जि ८४ दँ क्यंगु लसताय् सांस्कृतिक ज्याझ्वः कथं भजन हालेगु ज्याझ्वः तयातःगु दु ।

जितः जीवनय् आः वयाः छेँ छखा दने मफुत धैगु मनय् वं । छेँ छखा दने फुसा ज्यूगु खः । तर, थःहे दाजुकिजापिं बेक्वःपिं जूगुलिं थौंतक अंशबण्डा तकं मजुल । उकिं जि थौं नं थ्वहे कचवं दुने लाकातःगु छेँय् तुम्बहालय् लानाच्वंगु दु ।

ल्याय्म्ह बलय्या खँ ल्हायेबलय् जि न्ह्याथाय् वंसां कलाक्षेत्रय् हे लात । उगु इलय् दबू प्याखनय् म्हितेगु, म्ये हालेगु आः नं लुमं । छेँय् जि मां–अबुपिन्सं जितः ब्वःबिइगु इलय् नं प्याखं मचा धकाः हे ब्वःबिइगु । मचांनिसें मिलेजूम्ह पासा धयाम्ह दुर्गालाल ९जनकवि दुर्गालाल श्रेष्ठ० हे खः । जिं वयात कविता च्वयेत ग्वाकेगु, वं जितः म्ये हालेत ग्वाकीगु । दबू प्याखनय् नं नापं हे म्हिता । ‘थौं वइला कन्हय् वइला, ताला फुनाः वइला चिकुला।।।’ म्येया प्याखं नं दबुली जि मिसा जुया ल्हुया, दुर्गालाल मिजं जुया ल्हुल । जिगु छेँय् दुर्गालाल न्ह्याबलें धयाथें उबलय् दइ । जिपिं तसकं मिले जू ।

सम्मानया ल्याखं जितः यक्व हनेज्या याये धुंकल । दसिपौ नं चाङ्ग चाङ्ग हे दु । जितः ताः, जिके ध्यबा मदुसां पासापिन्सं इज्जत याः, ययेकू । ८४ दँया थ्व बैशय् पश्चाताप मदु, तर न्हाचः धयाथें छेँ छखा दने फुसा पासाभाईपिन्त सःताः नकेत्वंके यायेदइगु, थःत ब्यूगु दसिपौ ब्वयातये दइगु, आनन्दं च्वने दइला धैथें मनय् धाःसा वं ।

जिं म्ये हालेगु झ्वलय् ल्याय्म्ह बलय् छक्वः यलय् २९ सेकेन्ड राग काल धकाः च्वछायेगु याः । अथेहे, २००२ सालय् कान्छा गुरुजुं स्यनादीगु प्याखनय् प्याखंम्वः जुयाः म्हितागु इलय् उगु ईया जुजु त्रिभुवनं जितः झिंन्यातका दां लय्ताया बिल धकाः धाल । तर, ल्हातय् ध्यबा मलाः । जिं ध्यबा गन वन, धाये मसः । गुबलें नं जिं नांया नितिं, दांया नितिं ज्या मयाना । थःत नां दइला धकाः बिचाः याना नं छुं मयाना । समाजं छु बिल, वहे ग्रहण याना ।

थौंकन्हय् जि सुथय् त्यलं हे दनाः ख्वाःखीइ सिलेधुंकाः धर्म धा, मर्निङ्ग वाक धा, द्यःथाय् चाःह्यू वनेगु । भजनय् म्ये हालेगु खः । साईकल जिं न्हापांनिसें गयाः, आः नं गयाच्वनागु दु । ८५ दँतक साईकल गये फइला धकाः मनं तुनाच्वना । जि देनेबलय् गनं जि सुथय् दनाः हे वइमखुला धकाः ग्यासें चाहिँ वः । जितः सुयातं दुःख बिइ मयः । म्वातले ला दुःख मबिया, सीबलय् नं दुःख बिइ म्वायेक सीदुसा ज्यू धैगु इच्छा दु । छन्हु ला वने हे मानि । उकिं सुयातं दुःख मब्यूसे वनेगु इच्छा खः ।

( जनकलाकार भृगुराम श्रेष्ठ नेसं  ११३७ कछलागा पंचमी कन्हय् शनिवाः ८४ दँ क्यंगु लसताय् नेवाः अनलाइनन्यूजलिसे जूगु खँल्हाबल्हाया लिधंसाय् वय्कःया नुगः खँ न्ह्यब्वया फाइल पाखें)

Categorized in बिचा: