nepal lifef 2076 8 8

“आः ल्यं दूगु जीवन नेपालभाषाया नितिं समर्पण यायेगु जुइ” –लोककवि जकःमि

नेवा: अनलाइन न्युज – ललेन्द्र शाक्य | २०७६ मङ्सिर १४, शनिबार १७:०८:५४

किपूया नगरमण्डप श्रीकीर्ति विहारय् थौं शनिवाः जूगु ‘न्हेगां जात्रा’ म्येचाः सार्वजनिक ज्याझ्वलय् लोककवि राजभाई जकःमिं आः थःगु ल्यं दूगु जीवन नेपालभाषा साहित्य संगीत ख्यःया नितिं समर्पित जुइगु खँ कनादीगु दु । 

लोककवि जकःमिं आः नेपालभाषा साहित्य दुने चिनाखँ म्ये संगीतपाखे थःम्हं पलाः तयागु व तयातुं वनेगु बचं बिसें थःगु ल्यं दूगु जीवन थुगु हे ख्यलय् समर्पित जुइगु प्रतिबद्धता प्वंकादीगु खः ।

थःगु जन्मभूमि किपूया पांगाया भुजिन्द त्वालय् जूगु व अनया बेक्वःतँया विषयस लुमन्तिया छपासः चिनाखँ न्यंकूसें लोककवि राजभाई जकःमिं चिनाखँ म्येख्यलय् जनकवि दुर्गालाल श्रेष्ठं थःत ल्हाः ज्वनाः चिनाखँ म्ये च्वकाः थौं थनतक थ्यंकेत ताःलाःगुलिं हःपाः व प्रेरणा जनकवि श्रेष्ठया जूगु खँ नं ज्याझ्वलय् नुगःखँ तयेगु झ्वलय् कनादीगु दु ।

लोकवि राजभाई जकःमिया याकः च्वसाय् व लोकंह्वाःम्ह संगीतकःमि रीता महर्जनया याकः संगीतय् पिदंगु म्येचाः ‘न्हेगां जात्रा’ चिखिफ्ने ज्याझ्वलय् मूपाहाँ कथं जनकवि दुर्गालाल श्रेष्ठ झायादीगु खः । अथेहे, ज्याझ्वलय् प्रदेश ३ या सांसद पुकार महर्जन, किपू नगरपालिकाया मेयर रमेश महर्जन, पुलांम्ह पर्यटन राज्यमन्त्रीलिसें म्येच्वमि दिलीप महर्जन विशेष पाहाँ कथं झायादीगु खः । 

मन्दः फल्चा अमल्सि खलःया ग्वसालय् जूगु उगु ज्याझ्वः खलःया नायः मय्जु शोभा महर्जनया सभानायःसुइ न्ह्याःगु खःसा ज्याझ्वलय् जकःमि हःपाः दबूया नायः शेषनारायण महर्जन नं पाहाँ कथं झायादीगु खः ।

ग्वसाः खलः मन्दः फल्चा अमल्सि खलःया दुजः दानबहादुर महर्जनं लसकुस न्वचू बियादीगु उगु ज्याझ्वलय् मूपाहाँ जनकवि दुर्गालाल श्रेष्ठं त्वाःदेवाय् मत च्याकाः ज्याझ्वःया उलेज्या यानादीगु खःसा मूपाहाँ श्रेष्ठलिसें सकल विशेष पाहाँ व पाहाँपिन्सं मंकाः कथं म्येचाः ‘न्हेगां जात्रा’ सार्वजनिक यानादीगु खः । 

उगु ज्याझ्वलय् विशेष पाहाँ कथं झायादीम्ह किपू नगरपालिकाया मेयर रमेश महर्जनं ‘न्हेगां जात्रा’ म्येचाः पिथना पुचःया भिंतुना देछासें किपुली आपालं कलाकार व संगीतकःमिपिं दूगु खँ न्ह्यथंसें मल्लकालीन पुलांगु दाफा संगीत सुरुवातया संगीत जूगु व परिमार्जित जुजुं थौंकन्हय नेवाः संगीत ख्यः तब्या व धनी जूगु खँ न्ह्यथनादिल । मेयर महर्जनं किपू नगरपालिकापाखें सांगितिक व थीथी ज्याझ्वःया नितिं चकं दबू दयेकेगु प्रतिबद्धता नं प्वंकादीगु खः । 

अथेहे, विशेष पाहाँ कथं झायदीम्ह पुलांम्ह पर्यटन राज्यमन्त्री दिलीप महर्जनं नेवाःतय्गु हक अधिकार आःतक नं प्राप्त मजुनिगु खँ धासें संगीत ख्यः नं परिवर्तनया छगू मू विषय जूगु खँ न्ह्यथनादिलसा दुर्गालाल धुंकाः राजभाई वल, राजभाई धुंकाः सु वइगु धकाः न्ह्यसःचिं तयादिल । वय्कलं मेम्ह राजभाई जकःमि नं जन्म यायेमाःगु खँय् बः बियादीगु खः ।

थ्वहे झ्वलय् मेम्ह विशेष पाहाँ प्रदेश ३ या सांसद पुकार महर्जनं ‘न्हेगां जात्रा’ म्येचाःया म्येच्वमि लोककवि राजभाई जकःमि व संगीतकार रीता महर्जनयात प्रगतिया कामना यानाः प्रदेश ३ या नामांकनय् थःथवय् ल्वापु जुयाच्वंगु खँ न्ह्यथंसें प्रदेश ३ या नामाकरण ‘नेपाल मण्डल’ जुइमाःगु खँय् बः बियादीगु खः ।

ज्याझ्वलय् संगीतकःमि रीता महर्जनं म्येचाः पिथनेगु नितिं ग्वाहालि यानादीपिन्त सुभाय् देछासें संगीत ख्यलय् सदां समर्पित जुयाः संगीत ख्यःया विकासय् योगदान यायेगु ज्याय् गबलें लिमचिलेगु नुगःखँ प्वंकादीगु खः ।

अथेहे, संगीतकःमि पवित्र कसाः नं नुगःखँ तयेगु झ्वलय् ‘न्हेगां जात्रा’ पिथना पुचःयात व ग्वसाः खलः मन्दः फल्चा अमल्सि खलःयात भिंतुना देछासें नेपालभाषा संगीत ख्यलय् मिसाम्ह संगीतकारया रुपय् रीता महर्जन स्वम्हम्ह व दकले अप्वः म्येय् संगीत तयादीम्ह संगीतकार जुइत रीता महर्जन ताःलाःगु खँ तसें नेपालभाषा संगीत ख्यलय् मिसापिं संगीतकार उत्तरा मानन्धर, लसता जोशी व रीता महर्जन जक थःम्हं खंगु खँ तयादीगु खः ।

ज्याझ्वलय् मूपाहाँ जनकवि दुर्गालाल श्रेष्ठं गुबलेतक किपू लागाय् न्हेगां जात्रा दइ, उबलेतक किपू दइ, नेपाः दइ धकाः धयादिसें झीपिं तरवारं जक बुत, तर विचारं मबूगु खँ कसें झी नेवाःत सदां दयाच्वनीगु खँ कनादिल ।

ज्याझ्वलय् रीता महर्जनलिसें संगीता शाक्य, सतीश महर्जन, रानीशोभा महर्जन, रत्नशोभा महर्जन, स्वस्ती महर्जन, कृष्णमान डंगोल, सतीश महर्जनपिन्सं सार्वजनिक जूगु ‘न्हेगां जात्रा’ म्येचाः दुनेया म्ये हालाः न्यंकादीगु खःसा ज्याझ्वः ज्ञानमाला भजन म्येपाखें शुभारम्भ जूगु खः । अथेहे, भगवती महर्जन, न्हूच्छे दर्शन, गुज्ये मालाकारपिन्सं मंगल धून न्ह्यब्वयादीगु खः ।

उगु ज्याझ्वलय् ‘न्हेगां जात्रा’ म्येचाः दुनेया म्येहालामिपिं सरीता शाही, सानुबाबु महर्जन, पवित्र कसाः, रत्नशोभा महर्जन, कृष्णमान डंगोल, मथुरा महर्जन, रानीशोभा महर्जन, स्वस्ती महर्जन, ईश्वर अमात्य, श्रृजना श्रेष्ठ, संगीता शाक्य इत्यादी लिसें संगीत संयोजकपिं सन्तोष महर्जन, जीवित जल्मी, हरिशरण सायमिपिन्त सुभाय् पौ लःल्हाःगु खःसा मूपाहाँ, विशेष पाहाँपिन्त मतिनाया चिं देछाःगु खः ।

ज्याझ्वलय् किपू नगां पांगाया लिसेलिसें सुनागुथिया बौद्ध उपासक उपासिकालिसें आपालं कलाकार, संगीतकःमि व थीथी संघसंस्थाया व्यक्तित्वपिनिगु आपालं उपस्थिति दूगु खः ।

ज्याझ्वः ग्वसाः खलः मन्दः फल्चा अमल्सि खलःया छ्याञ्जे म्येच्वमि रामभक्त महर्जन रमझमं न्ह्याकादीगु खःसा ज्याझ्वः ज्याझ्वःया सभानायःलिसें ग्वसाः खलः मन्दः फल्चा अमल्सि खलःया नायः शोभा महर्जनं क्वचायेकादीगु खः ।

Categorized in नेवाः