ad 2076 5 18

‘‘नेवाः ताम्सालिङ्ग’ कि ‘नेपालमण्डल’ः नेवाः मत विभाजित मजुइ

नेवा: अनलाइन न्युज – निश्चल | २०७६ जेठ १८, शनिबार १०:५०:४४

निश्चल
नेपाःया न्हूगु संविधान दयेकेगु नितिं संविधानसभाया चुनाव लिसें संविधान घोषणाया लिपांगु दिंतक नेवाःतसें माग यानाच्वंगु नेवाः प्रदेश खः ।
११ गू प्रदेशया माग लिसें नेवाः आदिभूमि व बाहुल्यता दूगु लागा कःघानाः नेवाः प्रदेश घोषणा यायेमाःगु व नेवाः समुदायया अधिकार संवैधानिक रुपं सुरक्षित यायेमाःगु माग यानाः वयाच्वंगु खः । थथे खयां नं न्हूगु संविधानया घोषणा नां मदुगु ७ गू प्रदेशया घोषणा जुल ।
राजनीतिक रुपं नेवाः प्रदेशया माग यानाच्वंपिं कार्यकर्तात छखे निराश व हतास जुलसा मेखे वर्तमान राजनीतिक पार्टी खनां क्रुद्ध नं जुल । थ्वया लिपा नं बुलुहुँ बुलुमिथें न्ह्यानाच्वंगु आन्दोलनं आःया स्थितितक थ्यंबलय् ३ नम्बर प्रदेशया नां पहिचान खनेदइगु नामांकन जुइमाःगु माग ३ नम्बर प्रदेशया संसद दुने विधिवत रुपं दर्ता जूगु दु ।
छुं दिं न्ह्यः जक ३ नम्बर प्रदेशया नां नेवाः ताम्सालिङ्ग प्रदेश जुइमाः धकाः प्रदेशसभाया सांसद ओमबहादुर ग्लान व प्रतिमा श्रेष्ठ प्रस्तावक जुयाः दर्ता याःगु खःसा समर्थकय् रत्नबहादुर ढकाल, सीता अधिकारी, प्रेमबहादुर तामाङ जुयादीगु खः ।
३ नम्बर प्रदेशया नां नेवाः ताम्सालिङ्ग प्रदेश जुइगु सम्भावना म्हो जूसां आदिवासी जनजाति नेवाः व तामाङतय्गु आन्दोलनं स्थापित याःगु नेवाः ताम्सालिङ्ग प्रदेश दर्ता सां जुल, थ्व नं ऐतिहासिक खः धकाः झीसं तायेकाच्वनागु खः ।
थ्वहे दथुइ हानं शुक्रवाः सत्तापक्षया सांसदपिं व उगु पार्टीया शीर्ष नेतापिं लिसे क्वातुगु स्वापू दुपिं डा। अजयक्रान्ति शाक्य व बसन्त मानन्धरं नेपालमण्डल प्रदेश नामांकन जुइमाः धकाः विधिवत रुपं दर्ता याःगु दु ।
थथे, छुं दिं दुने हे ३ नम्बर प्रदेशया म्हसीका दूगु नेवाः ताम्सालिङ्ग प्रदेश व नेपालमण्डल प्रदेशया नां दर्ता जुइवं स्वाभाविक रुपं नेवाःतय्गु मत थ्व इलय् विभाजन जुइगु खनेदूगु दु । मुक्कं ३ नम्बर प्रदेशया नां नेवाः प्रदेश जुइमाः धयाच्वंपिं नेवाःत स्वनिगः व थ्वलिसें स्वाःगु लागा जनसंख्या व ऐतिहासिक आधारय् तामाङ्ग व नेवाःतय्गु जूगुलिं प्रदेश नम्बर ३ या नां नेवाः व तामाङ्ग जातिया मंकाः लागा कथं नेवाः ताम्सालिङ्ग प्रदेश धाःसां छुं पाइमखु धकाः छथ्वः नेवाःत थुगु नां नामांकन यायेगु नितिं थीथी कथंया संघर्ष व दबाबमूलक ज्याझ्वः न्ह्याकूगु खः ।
मेखे, वर्तमान राज्यसत्तापाखें जातीय पहिचानया नां थ्व इलय् गुगु नं कथं बिइमखु धैगु मानसिकता ज्वनाः ३ नम्बर प्रदेशया लागा इतिहासया कालखण्डंनिसें नेपालमण्डल धकाः धायेगु यानाच्वंगु प्रमाणित दूगुलिं प्रदेश ३ या नां नेपालमण्डल धकाः तःसां स्वीकार्य जुइगु विचाः प्वंकाः उकथं हे थ्व नां तयेगु नितिं ३ नम्बर प्रदेशया सत्तापक्ष विपक्ष सांसदपिन्त लबिङ्ग यायेगु ज्या यानाच्वंगु खः । थुकिया लिच्वः थ्यंमथ्यं खुलान्ह्यः सत्तापक्ष सांसद अजयक्रान्ति शाक्यं सार्वजनिक रुपं हे संचारमाध्यमयात ३ नम्बर प्रदेशया नां नेपालमण्डल तयेकेगु नितिं गृहकार्य जुयाच्वंगु व उगु प्रस्ताव थःपिन्सं यंकेगु जानकारी ब्यूगु खः ।
थौं वहे जानकारी सत्यताय् परिणत जूगु दु, ३ नम्बर प्रदेशया नां नेपालमण्डल तयेमाः धकाः दर्ता यायेगु निसें थ्व नांया पक्षय् सांसदपिं नाप सहलह ब्याकेगु ज्या जूगु दु ।
३ नम्बर प्रदेशसभाय् थथे दर्ता जूगु निगू नांया पक्षय् नेवाःतय्गु जनमत गुखे धैगु थ्व इलय् च्यूताःया विषय जूगु दु ।
नेपालमण्डलया पक्षय् वन धाःसा तामाङ्गत नाप राजनीतिक रुपं धोखा बिइगु जुइगु, मवन धाःसा मेखे नेवाः सांसदपिन्सं हःगु नेपालमण्डल प्रदेशया नां नं अल्पमतय् लानाः नेवाः ताम्सालिङ्ग न मवइगु व नेपालमण्डल नं मवइगु स्थिति ब्वलंगु दु । थ्व स्थिति नेवाः नेतृत्वपाखें सही निर्णय व आँट यानाः नेवाःतय्गु माग थ्वहे खः धकाः धायेमफुत धाःसा ३ नम्बर प्रदेशया नां झी थःथः हे ल्वानाः राजधानी प्रदेश वा बागमती प्रदेश जुइत बेर मदु ।
प्रदेशसभाय् थथे म्हसीका दूगु नामांकन निथासं निगू कथं दर्ता जूगु विषययात स्वयाः कायेगु खःसा प्रदेश आन्दोलनय् नेतृत्वदायी भूमिका म्हिताच्वंपिनिगु तःधंगु कमजोरी खनेदूगु दु । आःतकया राजनीतिक स्थिति स्वयेगु खःसा सत्तापक्षया बहुमत सांसद व प्रतिपक्षया बहुमत सांसदपिं नेपालमण्डल नामांकनया पक्षय् खनेदूगु दु ।
थ्व स्थितियात ध्यानय् तयाः स्वयेगु खःसा राजनीतिक रुपं वःगु हिउपाः दुने गथे नेवाः प्रदेश धाःसां प्राप्त यायेमफुत, थौं म्हसीका दूगु नां ३ नम्बर प्रदेशया छु जुइफइ, उकियात हे तत्कालया नितिं स्वीकार यानाः छगू हे मत दयेकाः आःतकया दुने प्राप्त जूगु अधिकारयात सुरक्षित यायेमाःगु खनेदु । छगू हे पक्षय् थःगु मत बिइमफुत धाःसा हान नं ३ नम्बर प्रदेशया नां म्हसीका मदूगु नामांकन जुइगु, थुकिं नेवाःतय्गु आन्दोलनय्  हानं तःधंगु क्षति जुइगु खनेदु ।

Categorized in बिचा: