ad 2076 5 18

‘सार्वजनिक जग्गा व पुखू संरक्षण यायेगु थःपिनिगु नीति हे खः’ –किपूया मेयर महर्जन

नेवा: अनलाइन न्युज – ललेन्द्र शाक्य | २०७६ भाद्र २५, बुधबार १६:५८:०१

पुखू संरक्षण यायेत किपूया मेयरयात पांगाबासीपाखें ज्ञापन पौ

स्थानीय जनतां ताःइलंनिसें उगु जग्गा सार्वजनिक जूगु धासें विरोधया सः थ्वयेकाः च्वंगुलिं कार्की छेँजःपिन्सं उगु निगू पुखूया जग्गा दाबी यायेगु आँट मयाःगु खः ।

किपू नगरपालिका दुनेया ऐतिहासिक बस्ती पांगाया निगू पुखू संरक्षण यायेगु नितिं पांगाया स्थानीय बासिन्दापिं बाजागाजालिसेंया जुलुस किपू नगरपालिकाय् वःगु दु । उगु जुलुसं म्हिगः मंगलवाः किपू नगरपालिकाया मेयर रमेश महर्जनयात ज्ञापन पौ लःल्हाःगु दु ।

किपूया ऐतिहासिक बस्ती पांगाया वडा ल्याः ५ या निगू कित्ता ल्याः १९ या ५ रोपनी ११ आना व कित्ता ल्याः १०७ या ७ रोपनी २ आना जग्गा २०२१ सालया जग्गाधनी दर्ता स्रेस्ताय् ‘पुखू’ धकाm न्ह्यथनातःगु खःसा धनीया महलय् ‘मिनाहा’ च्वयातःगु दु ।

उगु निगुलिं पुखू सार्वजनिक यायेमाः धकाः स्थानीय जनतां किपूया मेयर रमेश महर्जनयात ज्ञापन पौ लःल्हाःगु खः । ज्ञापन पो लःल्हानाः कायेधुंकाः मेयर रमेश महर्जनं सार्वजनिक जग्गा व पुखू संरक्षण यायेगु थःपिनिगु नीति हे दुगुलिं पुखू संरक्षण यायेत माःगु ग्वाहालि यायेगु प्रतिबद्धता प्वंकूगु खः ।

किपूया मेयर महर्जनयात लःल्हाःगु उगु ज्ञापन पौ किपू नपापाखें प्रधानमन्त्री ज्याकुथि व भूमिसुधार मन्त्रालययात बिइगु नितिं नं ब्यूगु दु ।

पांगाया उगु निगू सार्वजनिक पुखू संरक्षण संघर्ष समितिया कजि रविन्द्र महर्जनं ल्हाःचिं तयाः उगु ज्ञापन पौ लःल्हाःगु खः ।

निगुलिं पुखूया विषयस सरकारी, सार्वजनिक व गुथि जग्गा संरक्षण सम्बन्धी जाँचबुझ आयोग २०७६ ज्याकुथिं नं किपू नगरपालिकायात सर्जमिन यानाः उकिया प्रतिवेदन छ्वयाहिँ धका: पौ च्वःगु खःसा छुं दिं न्ह्यः जूगु सर्जमिनय् नं ३०१ म्ह स्थानीय बासिन्दां निगुलिं पुखू सार्वजनिक जूगु बयान ब्यूगु खः ।

बि.सं. २०२१ सालय् नापी विभागय् तकं पुखू धकाः न्ह्यथनातःगु उगु पुखू सहसेनानी हर्षजंग कार्कीं थःगु नामय् लालपूर्जा दयेकातःगु खः ।

कार्की मदयेधुंकाः वया निम्ह काय् राजेन्द्रजंग व सुरेन्द्रजंग कार्कीं मंकाः कथं लालपूर्जा दयेकुगु खः ।

तर स्थानीय जनतां ताःइलंनिसें उगु जग्गा सार्वजनिक जूगु धासें विरोधया सः थ्वयेकाः च्वंगुलिं कार्की छेँजःपिन्सं उगु निगू पुखूया जग्गा दाबी यायेगु आँट मयाःगु खः ।

उगु ज्याझ्वलय् किपू नगरपालिकाया उपमेयर सरस्वती खड्का रिजालया नं उपस्थिति दूगु खःसा ज्ञापन पौ लःल्हायेगु नितिं किपूया पांगा निवासी पुलांम्ह संस्कृति पर्यटन राज्यमन्त्री दिलीप महर्जन, पांगाया समाजसेवी प्रशान्त महर्जनलिसें आपालं व्यक्तित्वपिनिगु सहभागिता दूगु खः ।

Categorized in स्थानिय-समाज