nepal lifef 2076 8 8

‘भारतीय दुतावासया पौया लिसः परराष्ट्रं बिइमाः’ मन्त्री खनाल

नेवा: अनलाइन न्युज | २०७६ आषाढ २६, बिहिबार १६:०८:५०

कृषि व पशुपंक्षी विकासमन्त्री चक्रपाणि खनालं भारतं आयत जुइगु तरकारी व फलफूलया विषादी परीक्षणया सन्दर्भय् भारतीय दूतावासं छ्वयाहःगु पौया लिसः परराष्ट्र मन्त्रालयं बिइमाःगु धाःगु दु ।

भारतं आयात जुइगु तरकारीइ विषादी परीक्षण यायेगु न्ह्याकेधुंकाः भारतया दबाबय् सरकारं उगु निर्णय लितकाःगु खः । भारतीय दूतावासं हे पौ छ्वयाः दबाब ब्यूगु सन्दर्भय् धाःसा प्रधानमन्त्री लिसें मन्त्रीपिं थीथी अभिव्यक्ति बियाः लिचिलाः वयाच्वंगु खः ।

वहे सन्दर्भय् बिहिवाः रिपोर्टस क्लबय् ग्वसाः ग्वःगु साक्षात्कार ज्याझ्वलय् मन्त्री खनालं पौ परराष्ट्र मन्त्रालयस वःगु व उगु निगू देय् दथुया सम्बन्धया खँ जूगु धाःगु दु ।

मन्त्री खनालं न्ह्यःने धाःगु दु, “डब्ल्यूटीओ कथं पौ वःगु खः । थ्व सामान्य पौ खः । तर, थुकिया लिसः जिमिससिबें नं परराष्ट्रं बिइमाः ।”

विषादी परीक्षणया निर्णय लितकायेधुंकाः न्यंकभनं छचाखेरं आलोचना जूगु खः । अयसां, विषादी परीक्षण तत्काल मयायेगु मन्त्रिपरिषदया निर्णय कार्यान्वयन मयायेत सर्वोच्चं अन्तरकालीन आदेश बिइधुंकूगु दु ।

‘विषादी परीक्षण द्यूगु मदुनि’

मन्त्री खनालं विषादी चेकजाँच आः नं जारी हे जुयाच्वंगु स्पष्ट याःगु दु । विषादी परीक्षण थःगु हे प्रक्रियाय् जुयाच्वंगु वय्कःया धापू दु ।

नेपालय् आः अस्तित्वय् दूगु विषादी परीक्षण ल्याबतय्गु क्षमताय् न्ह्यसः दूगु न्यंकूसें मन्त्री खनालं ल्याबयात याकनं स्तरोन्नत्ति यायेगु विश्वास प्वंकूगु दु ।

विषादी चेकजाँच यायेगु निर्णयपाखें सरकार छाय् लिचिल ? धकाः न्ह्यसः ब्वलनाच्वंगु धासें मन्त्री खनालं निर्णयस नाकाय् चेकजाँच धैगु खँग्वः तःबलय् समस्या जूगु स्पष्ट याःगु दु ।

Categorized in राजनीति