telecom 18 kartik 2076

‘नो ब्रा’ अभियन्ता पप गायिका सुली सिनाच्वंगु अवस्थाय् लुल

नेवा: अनलाइन न्युज | २०७६ आश्विन २८, मंगलबार ११:०६:३०

‘नो ब्रा मुभमेन्ट’ अर्थात् ब्रा मफिइगु अभियान न्ह्याकूम्ह दक्षिण कोरियाया लोकंह्वाःम्ह गायिका सिनाच्वंगु अवस्थाय् लुयावःगु दु । दक्षिण कोरियाया राजधानी सोल लिक्क च्वंगु थःगु छेँय् गायिका सुली सोमवाः सिनाच्वंगु अवस्थाय् लुयावःगु खः ।

गायिका सुलीया म्यानेजरं छेँया निगूगु तलाय् सिनाच्वंगु अवस्थाय् लुइकेधुंकाः प्रहरीयात खबर याःगु खः । वं आत्महत्या याःगु अनुमानय् अनुसन्धान न्ह्यःने यंकूगु अनया प्रहरीं जानकारी ब्यूगु दु । अय्सां घटनास्थलय् सुसाइड नोट धाःसा लुयावःगु मदु ।

२५दँया सुलीया वास्तविक नां चोप जिन–रि खः । वं दक्षिण कोरियाय् ब्रा फिइगु व मफिइगु खँ मिसाया निजी मामिला व स्वतन्त्रताया खँ खः धैगु सन्देश ब्वलंकूगु खः ।

सुलीं इन्स्टाग्रामय् ब्रा मफ्यूसे कयातःगु किपाः पोष्ट यायेधुंकाः प्रशंसा व आलोचना निगुलिं जूगु खः । इन्स्टाग्रामय् दुपिं सुलीया लखौं फलोअर्सपिन्सं नं सुलीयात साथ बिइधुंकाः ‘नो ब्रा’ ह्यासट्याग ट्रेन्डिङय् वःगु खः ।

थःगु म्हगः गुकथं क्यनेगु धैगु खँ थःगु स्वतन्त्रताया खँ जूगु धाइम्ह सुलीं मे २०१६ स न्हापांगुखुसि ब्रा फिनामतःगु किपाः इन्टाग्रामय् सार्वजनिक याःगु खः । ब्रा मफ्यूसे कयातःगु किपाः व भिडियोय् निप्पल खनेदूगु धासें सुलीया आपालं आलोचना जूगु खः ।

अय्सां प्रभावशाली मिसा सःया रुपं म्हस्यूम्ह सुलीया समर्थकपिनिगु ल्याः नं अप्वयावंगु खः । आपासिनं सुलीयात साथ बिसें ब्रा फिनामतःगु थःगु किपाःत सामाजिक संजालय् सेयर याःगु खः ।

Categorized in कला