ad 2076 5 18

‘डेंगु नियन्त्रण यायेत संकटकाल घोषणा माः कि म्वाः ?’ –कांग्रेस सांसद

नेवा: अनलाइन न्युज | २०७६ भाद्र २५, बुधबार १५:२३:५३

“डेंगुया सन्दर्भय् धायेमालीबलय् सरकार गन दु ?, सरकारं छु यानाच्वंगु दु ?”

नेपाली कांग्रेसया सांसद राधेश्याम अधिकारीं मुलुकय् डेंगुया महामारी ब्वलनेधुंकुगुलिं सरकार. संकटकाल घोषणा यायेमाःगु धाःगु दु ।

राष्ट्रियसभाया विशेष इलय् न्वःवासें अधिकारीं सरकारं स्वास्थ्य क्षेत्रया संकटकाल घोषणा यानाः डेंगु नियन्त्रणया कुतः यायेमाःगु धाःगु दु ।

सांसद अधिकारीं धाःगु दु, “७७ जिल्लामध्ये ५६ जिल्लाय् डेंगु ब्वलनेधुंकूगु दु । थ्व राष्ट्रिय महामारी खः कि मखु ? राष्ट्रिय विपत्ति मानेयायेमाः कि म्वाः ? स्वास्थ्यय् संकटकाल घोषणा यायेमाः कि म्वाः ?”

सांसद अधिकारीं पश्चिम नेपाःया बाँके व बर्दियाय् डेंगु सुरु जूबलय् नियन्त्रणया कुतm प्रभावकारी मजुगुलिं हे आः ५६ जिल्लाय् फैलेजूगु खः ।

अधिकारीं धाःगु दु, “५६ जिल्लाय् डेंगु फैलेजुइधुंकूगु दु । म्हिग: झीसं पश्चिमया बाँके व बर्दियाय् जुबलय् अन लोकलाइज यायेफूगु खः । उकिया लिच्वः थन वयेधुंकूगु दु । आः राष्ट्रिय इमरजेन्सीया रुपं काये मफुसा थुकिं महामारीया रुप काइ ।”

सरकारं प्यम्ह न्याम्ह मनू सीवं महामारी धायेमज्यू धाःगु खँ संचारमाध्यमय् वःगु धासें सांसद अधिकारीं धाःगु दु, “ग्वःम्ह मनू सीधुंकाः थुकिं महामारीया रुप काइ व सरकारं थ्व खँ डिक्लियर याइ ?”

सरकारं प्यम्ह न्याम्ह मनू सीवं महामारी धायेमज्यू धाःगु खँ संचारमाध्यमय् वःगु धासें सांसद अधिकारीं धाःगु दु, “ग्वःम्ह मनू सीधुंकाः थुकिं महामारीया रुप काइ व सरकारं थ्व खँ डिक्लियर याइ ?”

डेंगुया हुनिं सकल जनतायाके ग्याःचिकु ब्वलंगु धासें सांसद अधिकारीं सरकारपाखें आधिकारिक दृष्टिकोण मवःबलय् सर्वसाधारण असमन्जसय् लाःगु धाःगु दु । अधिकारीं धाःगु दु, “डेंगुया सन्दर्भय् धायेमालीबलय् सरकार गन दु ?, सरकारं छु यानाच्वंगु दु ?” थौं जनतां थ्व न्ह्यसः न्यनाच्वंगु दु सरकारयाके । थःथवलय् विरोधाभासपूर्ण बुखं सकल जनता अन्यौलय् दु ।”

सांसद अधिकारीं डे.गु परीक्षण निःशुल्क यायेत नं सरकारयात आग्रह याःगु दु ।

सांसद अधिकारीं धाःगु दु, “डेंगु परीक्षणया वास्तविक लागत गुलि खः सरकारं धायेमाः । कम्ती नं संक्रामक रुपय् ब्वलंगु थ्व ल्वय्या परीक्षणय् तुइगु खर्च समाजवाद उन्मुख थ्व सरकारं ब्यहोरे यायेमाःगु मखुला ? थुकी तुइगु खर्च फुक्क जोडेयाःसां नं सुं भीआइपीं राष्ट्रिय कोषपाखें याःगु खर्चया अनुपातय् नगन्य हे जुइ ।”

मन्त्रीनिसें डाक्टरतक डेंगुया संक्रमणय् लाःबलय् सरकार धाःसा ‘खसु दुनेया क्वः’ जूगु सांसद अधिकारीं टिप्पणी याःगु दु ।

चितवनय् डेंगु परीक्षण शुल्क द्वःछि कायम याःगु बुखँ वःगु धासें अधिकारीं ३५० तकाया किटपाखें जुइगु परीक्षणय् द्वःछि तका तक कायेदइगु सहमति स्थानीय प्रशासनं हे याःगु लज्जा चाःगु खँ जूगु धाःगु दु ।

डेंगु नियन्त्रणया विषयस सरकार छु यानाच्वन धैगु विषयस अधिकारीं सरकारया नं लिसः फ्वंगु दु । अधिकारीं धाःगु दु, “डेंगुया विषयस सरकारं थःगु धापू तयेमा धैगु जिगु पार्टी व जिपाखें आग्रह यायेत जि थन उपस्थित जुयागु खः ।”

सांसद अधिकारीं डेंगु इलय् हे पहिचान जूसा ज्यान गुमेयायेमाली मखु धैगु जनचेतना सार्वजनिक यायेगु अत्यावश्यक जुइधुंकूगु धाःगु दु ।

Categorized in राष्ट्रिय