ad 2076 5 18

‘ज्येष्ठ नागरिकपिन्त सम्मान यायेदयाः जिं पूण्य कायेखन’ –ख्यालिजुजु मदनकृष्ण श्रेष्ठ (भिडियो)

नेवा: अनलाइन न्युज | २०७६ भाद्र ८, आइतबार १२:०२:२७

उस्ताद गोविन्द किपू फाउण्डेशनया ग्वसालय् न्याक्वःगु ज्येष्ठ नागरिक सम्मान व सांगितिक साँझ ११३९ ज्याझ्वलय् मूपाहाँ कथं झायादीम्ह ख्यालिजुजु मदनकृष्ण श्रेष्ठं ज्येष्ठ नागरिकपिन्त थःगु ल्हाःतं सम्मान यायेदयाः थःम्हं पूण्य प्राप्त यायेखंगु खँ थःगु नुगःखँ तयेगु झ्वलय् कनादीगु दु ।

किपूया ३ वडा कुतिसा त्वालय् भाद्र ६ गते शुक्रवाः जूगु उगु ज्याझ्वलय् ख्यालिजुजु श्रेष्ठं ज्येष्ठ नागरिक द्यः समान खः, सकलसिन हनाबना तयाः सकारात्मक विचाःपाखें ज्येष्ठ नागरिकपिनिगु सुसाकुसा यायेमाःगु विचाः प्वंकादीगु खःसा ज्याझ्वलय् छत्वाःचा अस्यः म्ये कथं ख्यालि म्ये न्ह्यब्वयाः स्वकिमिपिनिगु नुगः चंचं धायेकादीगु खः ख्यालिजुजु मदनकृष्ण श्रेष्ठं ।

ग्वसाः खलः उस्ताद गोविन्द किपू फाउण्डेशनया सल्लाहकार सुकराम महर्जन सनजनया सभानायःसुइ न्ह्याःगु उगु ज्याझ्वलय् विशेष पाहाँ कथं प्रदेश नम्बर ३ या सांसद पुकार महर्जन व अनक कन्स्ट्रक्सनया प्रमुख श्रीराम महर्जन झायादीगु खः ।

अथेहे, ज्याझ्वलय् पाहाँ कथं किपू नगरपालिका ३ वडाया वडाध्यक्ष राजेन्द्र महर्जन, २ वडाया वडाध्यक्ष लिसें किपू नपा सम्पदा, संस्कृति पर्यटन विभाग प्रमुख रमेशमान डंगोल, १ वडाया वडाध्यक्ष लिसें किपू नपा सुचुपिचु विभाग प्रमुख हर्ष महर्जन, ३ वडा दुजः ज्ञानप्रसाद महर्जन, लोककवि राजभाई जकःमि, कुतिसा त्वाःया समाजसेवी राजेन्द्र मानन्धर व बुद्धरत्न महर्जनपिन्सं आसन ग्रहण यानादीगु खः ।

फाउण्डेशनया छ्याञ्जे जयकृष्ण मानन्धरं लसकुस न्वचू बियादीगु उगु ज्याझ्वः मूपाहाँ ख्यालिजुजु मदनकृष्ण श्रेष्ठया ल्हाःतं त्वाःदेवाय् मत च्याकाः उलेज्या यानादीगु खःसा ज्याझ्वलय् कुतिसा त्वालय् थुगु दँ मदुपिं प्यम्ह मनूया लुमन्तिइ १ मिनेट मौनधारण नं याःगु खः ।

किपू नगरपालिका ३ वडा कुतिसा त्वाःया थ्यंमथ्यं २३ म्ह ज्याथः जिथि ज्येष्ठ नागरिकपिन्त हनेज्या जूगु उगु ज्याझ्वलय् मूपाहाँ ख्यालिजुजु श्रेष्ठया ल्हाःतं दोसल्ला न्ययेकाः हनेज्या जूगु खःसा विशेष पाहाँ ३ नम्बर प्रदेश सांसद पुकार महर्जनं सिन्हः तिकाः विशेष पाहाँ अनक कन्स्ट्रक्सनया प्रमुख श्रीराम महर्जनपाखें थीथी हलंज्वलं लःल्हानाः, पाहाँपिं ३ नम्बर वडाध्यक्ष राजेन्द्र महर्जनपाखें कोखा, लोककवि जकःमिपाखें हनापौ लःल्हानाः व ज्याझ्वःया ग्वाहालिमि कुतिसा मिसा पुचःपाखें ख्येँँ सगं लःल्हानाः सम्मान यायेगु ज्याझ्वः जूगु खः ।

ज्याझ्वलय् थीथी विधाया ७ म्ह व्यक्तित्वपिन्त नं सम्मान यायेगु ज्याझ्वः जूगु खः । वय्कःपिं ७ म्ह व्यक्तित्वपिन्सं मूपाहाँ ख्यालिजुजु मदनकृष्ण श्रेष्ठं हनापौ लःल्हानादीगु खःसा ग्वसाः खलः उस्ताद गोविन्द किपू फाउण्डेशनया नायः दिलीप किपूपाखें खादा न्ययेकादीगु खः ।

सम्मानित जूपिं ७ ब्यक्तित्वपिं बरिष्ठ गितारवादक अनिल शाही, बरिष्ठ संगीतकःमि लिसें उस्ताद गोविन्द किपूया शिष्य राजु जः, ख्यालि कलाकार पल्पसा डंगोल चम्सुरी, पत्रकार श्रीकृष्ण महर्जन, यलया बाद्यगुरु हरिलाल श्रेष्ठ, बाँसुरी बादक विनय महर्जन व ईमेज च्यानल समेबजिया ख्यालिमि सुरेन्द्र मानन्धर खः ।

उगु ज्याझ्वलय् लोककवि राजभाई जकःमि उस्ताद गोविन्द किपूया विषयस चिनाखँ न्यंकादीगु खःसा किपू देय् सम्बन्धि चिनाखँ किपूया कवि नरेनमान व मचा प्रतिभा कवयित्री सलिना महर्जनं न्यंकादीगु खः ।

ज्याझ्वलय् किपूया साहित्यकःमि गणेशलाल महर्जनं च्वयादीगु व ज्ञानेश्वर निभाः नं लसय् हनादीगु अले स्वयं ज्ञानेश्वर निभाः व राजु जः नं हालादीगु लसकुस म्ये न्ह्यब्वःगु खः ।

न्हापांगु चरण कथं ज्येष्ठ नागरिक सम्मान ज्याझ्वः धुंकाः सांगितिक साँझ ज्याझ्वः जूगु खःसा ज्याझ्वः ललेन्द्र शाक्य व सरिना बज्राचार्यं न्ह्याकादीगु खः ।

निगूगु ब्व कथं न्ह्याःगु सांगितिक साँझ ज्याझ्वलय् इमेज च्यानलया समेबजि पुचःया विशेष प्रस्तुति जूगु खःसा सम्मानित व्यक्तित्व ख्यालि कलाकार पल्पसा डंगोल चम्सुरीं नं स्वकूमिपिन्त इतिइतिं न्हिइकादीगु खः ।

अथेहे, ज्याझ्वलय् न्हूप्रतिभा म्येहालामि किपुया भुवन महर्जन, नांजाःम्ह म्येहालामि राजेश महर्जन नेवाः, कुतिसा त्वाःया प्रतिभावान् ल्यायम्ह म्येहालामि अतुल मानन्धर, नांजाःम्ह म्येहालामि सरस्वती मानन्धर, लक्ष्मी रिसाल, सुरेश मानन्धर इत्यादी कलाकारपिन्सं म्ये न्ह्यब्वयादीगु खःसा स्थानीय थीथी मचा कलाकारपिन्सं हुलाप्याखं न्ह्यब्वःगु खःसा नीलः सांस्कृतिक पुचःपाखें आकर्षक हुलाप्याखं न्ह्यब्वःगु खः ।

थुगु ज्येष्ठ नागरिक सम्मान व सांगितिक साँझ ११३९ सुथां लाकेगु नितिं कुतिसा त्वाः सकल परिवारलिसें युवा म्ये खलः व नीलः पुचःलिसें कुतिसा मिसा पुचःपाखें विशेष ग्वाहालि याःगु खः ।

(थन क्लीक यानाः ख्यालिजुजु मदनकृष्ण श्रेष्ठया ख्यालिम्ये स्वयादिसँ)

Categorized in नेवाः