telecom 18 kartik 2076

‘जन्मभूमिइ लगानी यानादिसँ’ –राष्ट्रपति भण्डारी

नेवा: अनलाइन न्युज | २०७६ आश्विन २८, मंगलबार १२:५७:३८

राष्ट्रपति विद्यादेवी भण्डारी गैरआवासीय नेपाःमिपिनिगु संघ एनआरएनएया गुक्वःगु सम्मेलनया उलेज्या यासें जन्मभूमिइ लगानी यायेत आह्वान याःगु दु । लगानीया नितिं आन्तरिक व बाह्य निगुलिं ढंगं अनुकुल लकस ब्वलनेधुंकूगु धासें राष्ट्रपति भण्डारीं लगानीया नितिं आह्वान याःगु खः ।

राष्ट्रपति भण्डारीं धाःगु दु, “नेपाः लगानीया नितिं अनुकूल जुजुं वंगु दु । आन्तरिक व बाह्य लकस लगानीया नितिं योग्य जूगुलिं ढुक्क जुयाः लगानी यानादिसँ ।”

राजनीतिक अस्थिरताया हुनिं विगतय् लगानी असुरक्षित जूगुपाखे संकत यासें राष्ट्रपतिं आः अथे मजुइगु धाःगु दु । लगानी सुरक्षाया नितिं सरकारं थीथी नीतिगत व्यवस्था याःगु राष्ट्रपतिया धापू दु ।

राष्ट्रपति भण्डारीं धाःगु दु, “छिकपिन्सं आर्जन याःगु ज्ञान, सीप, क्षमता व दक्षतायात नेपाःया विकासय् उपयोग यायेमाः । थुकिया नितिं सरकारं संयन्त्र खडा यायेधुंकूगु दु । थुकिं जितः लसता पिज्वयेकुगु दु ।”

विदेशय् वंपिं नेपाःमिपिनिगु हकहितया नितिं पलिस्था याःगु गैरआवासीय नेपाली संघ एनआरएनएया गुक्वःगु अन्तर्राष्ट्रिय महाधिवेशन थौं मंगवाःनिसें येँय् न्ह्याःगु दु ।

सम्मेलनय् ८१ गू देसं २५०० म्ह प्रतिनिधि सहभागी जूगु दु । निन्हुतक न्ह्याइगु उगु सम्मेलनं नेतृत्व ल्ययेगु निसें महत्वं जाःगु सांगठनिक निर्णय याइ ।

नायः पदय् बामपन्थीपाखें कुमार पन्त व प्रजातान्त्रिक पुचःपाखें कुल आचार्य मैदानय् दु ।

Categorized in राष्ट्रिय