nepal life 2076 3 18

Error message

Deprecated function: The each() function is deprecated. This message will be suppressed on further calls in _menu_load_objects() (line 579 of /home/newahub/public_html/includes/menu.inc).

‘अझ नं छवाः च्वय् क्वय् जुइगु खनेदु लुँया भाः’ –पुलांम्ह नायः तेजरत्न शाक्य

नेवा: अनलाइन न्युज | २०७६ श्रावण २९, बुधबार १७:०७:०६

नेपालय् लुँ वहःया भाः म्हिगः ७१ हजार छगू तोलाया थ्यंगु खः तर थौं छुं भच्चा क्वाहाँ वयाः ७० हजार ३ सय तका थ्यंगु दु ।

थथे आकाझाकां लुँ वहःया भाः थुकथं अप्वःगुया मू हुनिं चीन व अमेरिकाया दथुइ व्यापारिक युद्ध यानाः खः । वंगु स्वला प्यला न्ह्यवःनिसें चीन व अमेरिका दथुइ ब्यापारया विषयस अलमल जुयाच्वंगु खः । तर अमेरिकां छुं दिं न्ह्यः जक चीनं छ्वयाहःगु ३ अर्ब डलरया सामानय् २५ प्रतिशत भन्सार कायेवं लुँया भाः छक्वलं ह्वात्त हे थाहाँ वंगु खः ।

वंगु श्रावण १६ गते चीन व अमेरिकाया दथुइ जी–२० या वार्ता स्वन्हुयंकं जूगु खः । तर उगु वार्ता छुं हे निष्कर्ष मजूसे त्वाःदयेवं थुकिया लिच्वः लुँया भाःयात लाःवंगु दु ।

थथेहे, लुँया भाः क्वाहाँ वंगु मेता हुनिं फेडिरिजम बैंकं ब्याजदर क्वपाःगुलिं लुँ न्यानाः सुरक्षित रकम दयेकेत स्वःगुलिं नं खः । मेखे सेयर बजारया भाः न्हियान्हिथं क्वाहाँ वनाच्वंगु हुनिं यानाः सेयर बजारया लगानीया दां लुँवहःपाखे लाःगुलिं यानाः नं लुँया भाः थाहाँ वंगु खः ।

थथे, छगू तोलाया छुं दिंया दुने प्यद्वःनिसें न्याद्वः तका दां थाहाँ वंगुया हुनि. भारतय् काश्मिर विवादं यानाः नं खः । काश्मिर विवाद जुइवं अन्तर्राष्ट्रिय बजारय् भारतीय दांया भाः क्वाहाँ वन व नेपाःया दां नं कमजोर जुल । थुकिं यानाः झीगु नितिं डलर थिके जुल ।

लुँया भाः म्हिगः नं थौंया दुने छुं भच्चा क्वाहाँ वःगु हुनि चीन व अमेरिकाया दथुइ हाकनं नं व्यापार सम्बन्धी वार्ता यायेगु तयारी जूगुलिं खः । थुकथं स्वयेबलय् नेपालय् लुँया भाः छवाःतक अझ नं च्वय् क्वय् जुइगु खनेदु ।

लुँया भाः थथे छक्वलं आपालं थाहाँ वंगु हुनिं यानाः लुँया व्यापार उथलपुथल हे जूगु दु । लुँ मिइपिं यक्व लुँ थाहाँ वंगु हुनिं पसलय् पसलय् लुँ स्टक लाःगु व अथेहे, राष्ट्र बैंकय् नं थ्व इलय् लुँ थानाच्वंगु दु । राष्ट्र बैंकया लुँ न्हिथं न्यागू किलो हे पिहाँ वनाच्वंगु मदु ।

न्हापाया दँया श्रावण महिनाय् लुँया भाः ६३ हजार ३ सय तका थ्यंगु खःसा थ्व भाः फागुन दुने ६५ हजार थ्यंगु खः । आः थ्वहे श्रावण महिनाय् ७०–७१ हजारया दथुइ च्वय् क्वय् जुयाच्वंगु दु ।
अन्तर्राष्ट्रिय स्थितियात ध्यानय् तयाः स्वयेगु खःसा अझ नं छवाःया ई लुँया भाःया स्थिरता गुकथं जुइ थ्व स्वये हे ल्यं दनि ।

(नेपाल सुनचाँदी व्यवसायी महासंघया पुलांम्ह नायः तेजरत्न शाक्यलिसे खँल्हाबल्हा)

Categorized in बजाः