४० म्ह आप्रवासी सित लिबियाय्, ग्यानापूगु हवाई आक्रमण
नेवा: अनलाइन न्युज | २०७६ आषाढ १८, बुधबार ११:०७:३५
लिवियाया आप्रवासी हिरासत केन्द्रय् अवाई आक्रमण जुयाः कम्ती नं ४० म्ह आप्रवासीपिनिगु ज्यान वंगु दु ।
राजधानी त्रिपोलीया पूर्वी क्षेत्रया आप्रवासी हिरासत केन्द्रय् आक्रमण जूगु खः । सीपिं आपालं अफ्रिकन आप्रवासी खः ।
बीबीसीया कथं, हवाई आक्रमणय् लानाः ८० म्ह घाःपाः जूगु दु । घाःपाः जूपिनिगु अवस्था तच्वः जूगुलिं सीपिनिगु ल्याः अप्वइगु अनुमान याःगु दु ।
लिवियाया आपतकालीन सेवा केन्द्रया प्रवक्ता ओसामा अलीं ब्यूगु जानकारी कथं हिरासत केन्द्रय् १२० म्ह आप्रवासी दूगु खः ।
अलीं धाःगु दु, “आक्रमणय् थप आप्रवासी स्याःगु जुइफु । छाय् धाःसा, थ्व प्रारम्भिक तथ्यांक जक खः ।”
आःतक आक्रमण सुनां याःगु खः धैगु सीमदुनि । तर, संयुक्त राष्ट्रसंघया समर्थन प्राप्त सरकारया प्रधानमन्त्री फयज अल सेररां घटनाय् लिवियन नेशनल आर्मीया संलग्नता दूगु दाबी याःगु दु । लिवियन नेशनल आर्मी थःगु हे देसया समर्थन प्राप्त सरकार जुइमाःगु माग वया दु । थ्वहे माग तयाः थ्व संगठन संघर्षरत जुयाच्वंगु दु ।
बीबीसीया कथं, आप्रवासीया नितिं लिविया जुयाः युरोप दुहाँ वयेत सहज जू । उकिं लिपांगु इलय् अफ्रिकाया आप्रवासीपिं लिवियाया लँपु जुयाः युरोप दुहाँ वइगु खः ।
निरंकुश शासक जूगु अनया शासक मुअमर गद्दाफीयात द्वपं लाःसां नं वया शासनकालय् लिविया आःथें कमजोर मजूगु खः ।
सन् २०११ स गद्दाफी स्यायेधुंकाः लिविया हिंसा व विभाजनया चक्रव्यूहय् फसेजूगु खः ।
आन्तरिक कारणं कमजोर लिवियाया फाइदा कासें लिपांगु इलय् अफ्रिकन आप्रवासीं युरोप दुहाँ वनेगु गन्तव्यया रुपं लिवियायात छ्यलाः वयाच्वंगु खः ।
Categorized in अन्तर्राष्ट्रिय