नेवा: अनलाइन न्युज – ललेन्द्र शाक्य | २०७६ श्रावण १, बुधबार १५:२४:२३

ख्वपया सूर्यविनायकया भक्तपुर पार्टी भेन्युया हलय श्रावण ४ गते न्हिनसिया १ ता इलय्

भक्तपुर सांगितिक समाज व विनाता कला प्रतिष्ठानया मंकाः ग्वसालय् शुभारम्भ द म्युजिकल जर्नीया न्ह्यब्वया सांगितिक श्रद्धाञ्जलि ज्याझ्वः जुइगु जूगु दु ।

उगु ज्याझ्वःया कजि लिसें ग्वसाः खलः भक्तपुर सांगितिक समाजया छ्याञ्जे अल्बर्ट बज्राचार्यं बियादीगु जानकारी कथं उगु सांगितिक श्रद्धाञ्जलि ज्याझ्वः श्रावण ४ गते शनिवाः न्हिनसिया १ ता ईनिसें ख्वपया सूर्यविनायकय् च्वंगु भक्तपुर पार्टी भेन्युया हलय् जुइगु जूगु दु ।

भाजु बज्राचार्यं धयादी, “नेपाली सुगम संगीतया अजर अमर श्रष्टा मदुम्ह अरुण थापाया २० क्वःगु स्मृति दिवस व सांगितिक श्रद्धाञ्जलि ज्याझ्वःया लिसें अरुण थापा स्मृति सम्मान २०७६ ज्याझ्वः कथं यायेत्यनागु दुसा उगु हे ज्याझ्वलय् सुशील चालिसे संगीत पुरस्कार लःल्हायेगु ज्याझ्वःया लिसें म्यूजिक भिडियो सार्वजनिकीकरण ज्याझ्वः नं तयातयागु दु ।”

बरिष्ठ संकिपाकःमि, संस्कृतिविद् व म्येच्वमि चेतन कार्की व बरिष्ठ म्येच्वमि नगेन्द्र थापा उगु ज्याझ्वलय् विशिष्ट पाहाँ कथं झायादीगु जानकारी नं ज्याझ्वःया कजि लिसें समाजया छ्याञ्जे अल्बर्ट बज्राचार्यं बियादीगु दु ।

अथेहे, उगु ज्याझ्वलय् ‘अरुण थापा स्मृति सम्मान २०७६’ पाखें बरिष्ठ म्येच्वमि भूषण खरेलयात सम्मान याइगु ज्याझ्वः तयातःगु दुसा ‘सुशील चालिसे संगीत पुरस्कार’ आयुष केसीयात लःल्हायेत्यंगु दु ।

ज्याझ्वलय् राजेशमान केसीया ‘सोरेकैको डाँडैमा...’ म्येया म्यूजिक भिडियो सार्वजनिकीकरण याइगु जूगु दु ।

ग्वसाः खलः भक्तपुर सांगितिक समाजया छ्याञ्जे लिसें उगु ज्याझ्वःया कजि अल्बर्ट बज्राचार्यं ज्याझ्वलय् उपस्थितिया नितिं सकलसित इनाप यानादीगु दु ।

Categorized in कला