ad 2076 5 18

हाकनं संचालन जुइगु जुल एभरेष्ट होटल

नेवा: अनलाइन न्युज | २०७६ आषाढ २५, बुधबार ११:४०:०७

कर्मचारीपिन्त स्वापू तयेत १५ न्हुया म्याद

बन्द अवस्थाय् लानाच्वंगु बानेश्वरय् च्वंगु होटल एभरेष्ट इन्टरनेशनल लिमिटेडं नियमित ज्याय् लिहाँ वयेत श्रमिकपिन्त आग्रह याःगु दु ।

संचालनया तयारीइ दूगु होटल एभरेष्टं बुधवाः छगू सुचं सार्वजनिक यासें होटलया फुक्क कर्मचाीपिन्त ज्याय् लिहाँ वयेत आग्रह याःगु खः ।

होटलया मानव संशाधन विभागं ज्याय् लिहाँवये इच्छुक श्रमिकपिन्त १५ न्हुया ई ब्यूगु दु । क्वःछ्यूगु ई दुने सम्पर्कय् मवःसा रोजगारीया ग्यारेन्टी मजुइगु व उकिया पलेसा न्हूपिं कर्मचाी भर्ना प्रक्रिया न्ह्याकेगु होटल व्यवस्थापनं प्रष्ट याःगु दु ।

लगानीया विषयस संचालकदथुइ विवाद जुइधुंकाः ११६ गू कोठा, स्वंगू रेष्टुराँ, छगू बार व स्वंगू चीधंगु तःधंगु हल दूगु ३६ दँ पुलांगु होटल २०७२ बैशाख १२ गते भुखाय् लिपा बन्द जूगु खः ।

होटल बन्द लिपा रोजगारविहीन श्रमिकं संघर्ष तकं यानाः वयाच्वंगु खः । होटल मजदूरया आन्दोलन लिपा होटल व्यवस्थापन व संयुक्त संघर्ष समिति दथुइ २०७५ फागुन १२ गते १२ बुँदे सम्झौता जूगु खः ।

सम्झौताय् बन्द होटल संचालनय् हयाः पुलांपिं हे श्रमिकयात लितहयेगु लिसेंया विषय न्ह्यथनातःगु दु । वहे सम्झौता कथं होटल संचालनया तयारी तीव्र गतिइ जुयाच्वंगु होटल मानव संशाधन व प्रशासन निर्देशक नारायण पौडेलं जानकारी ब्यूगु दु ।

Categorized in बजाः