nepal investment baink

हाकनं प्रम ओली सिंगापुर वनीगु, प्रचण्ड कार्यवाहक नायः

नेवा: अनलाइन न्युज | २०७६ भाद्र १, आइतबार १७:२३:४६

सिंगापुरय् ९ दिं वासः याकाः लिहाँ वःम्ह प्रधानमन्त्री केपी शर्मा ओली थप वासः यायेगु नितिं थ्वहे वाः हाकनं सिंगापुर वनीगु जूगु दु ।

प्रधानमन्त्रीया स्वास्थ्य स्थितिबारे जनमानसं च्यूताः प्वंकाच्वंगु इलय् ओली स्वदेश लिहाँ वःगु छवाः लिपा हे हाकनं निक्वःगुखुसि ‘फलोअप’या नितिं सिंगापुर वनेत्यंगु खः ।

प्रधानमन्त्री सिंगापुर प्रस्थान भाद्र ४ वा ५ गते जुइगु उच्च सरकारी स्रोतं जानकारी ब्यूगु दु । १२ दँ न्ह्यः जलास्यँ प्रत्यारोपण यानाः प्रधानमन्त्री ओलीं आःतक नियमित वासः नयाच्वंगु दु ।

न्हापांगु वा सिंगापुरय् चलेयाःगु न्हूगु वासःया इफेक्ट बारे थप जाँचया नितिं सिंगापुर वने हे माःगु जूगु प्रधानमन्त्री लिक्क लाःम्ह छम्ह नेतां जानकारी ब्यूगु दु ।

प्रधानमन्त्री ओली वंगु साउन १८ गते स्वास्थ्य जाँचया नितिं सिंगापुर वंगु खः । साउन १९ निसें छवाःतक ओली अस्पतालय् हे च्वंगु खः । क्वःछ्यूगु ईसिबें छन्हु लिपा लाकाः प्रधानमन्त्री साउन २७ गते येँय् लिहाँ वःगु खः । स्वदेश लिहाँ वःबलय् विमानस्थलय् ओलीं संचारकmमिपिन्त छुं नं जानकारी मब्यूगु खः । छुं ई लिपा प्रधानमन्त्रीं ट्विट यासें स्वास्थ्य पायछि जूगु धाःगु खः ।

पुलांगु वासः हिलाः न्हूगु चलेयाःम्ह प्रधानमन्त्रीं स्वदेश लिहाँ वयेखतं वामदेव गौतमयात उपाध्यक्ष दययेकेगु निसें ईश्वर पोखरेलयात स्कूल विभागया प्रमुख दयेकेगु तकया निर्णयत फटाफट याकूगु खः । थ्वलिसें पार्टीया अढाइ दर्जनसिबें अप्वः विभागतसें पूर्णता काःगु खः ।

थप वासः यायेगु नितिं सिंगापुर वनेन्ह्यः थौं आइतवाm प्रम ओलीं संसदयात सम्बोधन याःगु खः । तर, संसदयात याःगु सम्बोधनय् प्रधानमन्त्रीं थःगु स्वास्थ्य व सिंगापुर भ्रमणबारे संसदयात छुं नं जानकारी मब्यूगु खः ।

Categorized in राजनीति