नेवा: अनलाइन न्युज | २०७६ भाद्र १५, आइतबार १३:०७:००

अमेरिकाया टेक्सासय् छम्ह बन्दुकधारीं लाक्वपाक्व गोली चलेयाःबलय् कम्ती नं न्याम्ह मनूत सीगु दुसा दर्जनौं मल्याक्क मनूत घाःपाः जूगु दु ।

एल पासोय् प्यवाः न्ह्यः जूगु घटना क्वमलाःनि बलय् हाकनं टेक्सासया पश्चिमी सहरत ओडिसा व मिडल्याण्डय् शनिवाः न्हिनय् बन्दुक आक्रमण जूगु खः ।

टेक्सासया प्रहरी प्रवक्तां घटनाया पुष्टि यासें गाडीइ सवार बन्दुकधारीया आक्रमणं न्याम्ह मनू सगिु व मेपिं १६ म्ह घाःपाः जूगु जानकारी ब्यूगु दु ।

ओडिसाया अस्पतालय् वासः जुयाच्वंपिं घाःपाः जूपिंमध्ये ७ म्हेसिगु अवस्था तच्वः जूगुलिं सीपिनिगु ल्याः अप्वइगु अनुमान याःगु दु ।

अमेरिकी संचारमाध्यमतसें जानकारी ब्यूकथं निदँ क्वय् च्वंपिं मचायात तकं बन्दुकधारीं गोली क्ययेकुगु दु । उपि. मचातय्गु आः ओडिसाया अस्पतालय् वासः जुयाच्वंगु धाःगु दु ।

ओडिसा नगरया प्रहरीया कथं बन्दुकधारीं दकले न्हापां थःगु गाडी पंम्ह ट्राफिक प्रहरीयात गोली प्रहार याःगु खः । थ्यंमथ्यं ३० दँया उपिं बन्दुकधारीं वधुंकाः हुलाक सेवाया ट्रक नियन्त्रणय् कयाः मिडल्याण्ड नगरपाखें वंगु खः ।

प्रहरीं छम्ह संदिग्ध गोरा पुरुषयात गोली क्ययेकाः स्याःगु दु । वयात प्रहरीं छगू सिनेमाघर लिक्क गोली क्ययेकाः स्याःगु खः । घटनाय् मेमेपिं मनूतय्गु संलग्नता दू मदुगु बारे अनुसन्धान जुयाच्वंगु धाःगु दु ।

गोली छु प्रयोजनया नितिं क्ययेकल धैगु आःतक सीमदुनि ।

घटनाबारे महान्यायाधिवक्तापाखें जानकारी काःम्ह अमेरिकाया राष्ट्रपति डोनाल्ड ट्रम्पं एफबीआई लिसेलिसें थुकिया बारे अनुसन्धान यानाच्वंगु च्वःगु दु ।

मास सुटिङ अमेरिकाया नितिं छुं न्हूगु घटना मखु । प्यवाः न्ह्यः जक नं टेक्सासया एल पासोय् लाक्वपाक्व गोली प्रहार जूगु खः । उगु घटनाय् लानाः २२ म्ह मनूत सीगु खःसा २४ म्ह घाःपाः जूगु खः ।

Categorized in अन्तर्राष्ट्रिय