telecom 18 kartik 2076

सोनिया गान्धी जुल अन्तरिम अध्यक्ष, राहुलया राजीनामा कांग्रेस आईपाखें स्वीकृत

नेवा: अनलाइन न्युज | २०७६ श्रावण २६, आइतबार ११:३५:४६

भारतीय कांग्रेसं अध्यक्ष राहुल गान्धीया राजीनामा स्वीकृत यानाः राहुलया मां सोनिया गान्धीयात अन्तरिम अध्यक्ष ल्यःगु दु । थ्वसिबें न्ह्यः सोनिया गान्धीलिपा राहुल गान्धीयात अध्यक्ष ल्यःगु खः ।

लोकसभा चुनाव २०१९ स कांग्रेस पराजित जुइधुंकाः राहुलं नैतिकताया आधारय् पार्टीइ राजीनामा लःल्हाःगु खः । तर, तत्काल वया राजीनामा अस्वीकृत याःगु खः ।

शनिवाः च्वंगु कांग्रेस कार्यसमितिया बैठकं राहुलया राजीनामा स्वीकृत यासें हाकनं सोनियायात हे अन्तरिम अध्यक्ष ल्यःगु कांग्रेस नेता गुलाम नबी आजादयात उद्धृत यासें बीबीसीं जानकारी ब्यूगु दु । सोनिया भारतीय कांग्रेसय् दकले ताःईतक अध्यक्ष जूम्ह नेतृ खः । मेम्ह अध्यक्ष मल्यःतलेतक आः पार्टीया नेतृत्व सोनियां हे याइगु जूगु दु ।

कार्यसमितिया बैठकय् नेतापिन्सं राहुलयात राजीनामा पौ लितकायेत धाःगु खः, तर राहुलं अस्वीकार याःगु बुखँय् न्ह्यथनातःगु दु । वं राजीनामा पतिइ मेपिनिगु जवाफदेहिता मालेन्ह्यः थः जवाफदेही जुइत आवश्यक जूगु धाःगु दु ।

सन् २०१४ या चुनावय् कांग्रेस आई पराजित जूसां नं राहुल गान्धी हे पार्टी अध्यक्ष खः । उगु इलय् ५४३ सिटमध्ये कांग्रेस आई नं मुक्कं ४४ सिट त्याकूगु खः । थुगु दँ वं ५२ सिट हःगु खः ।

कांग्रेस कार्यसमितिया बैठकय् जम्मु कश्मीरया विशेष राज्यया दर्जा खोसेयाःगु विषयस नं सहलह जूगु खः । बैठकलिपा राहुलं जम्मु कश्मीरया लिपांगु अवस्थाबारे जानकारी बिइत प्रधानमन्त्रीयात आग्रह यायेगु निर्णय बैठकं याःगु धाःगु दु ।

 

Categorized in अन्तर्राष्ट्रिय