telecom 18 kartik 2076

सु खः प्रगतिशील ?

नेवा: अनलाइन न्युज | २०७६ आश्विन २४, शुक्रबार २३:००:१८

ओशो
जिं न्यनागु दु कि छम्ह तसकं विचारशील मिसा गुरडिूस स्टेन थःगु मृत्यु शैय्याय् दु । लिपांखुसी वं थःगु मिखा चायेकल, अले थःलिक्क च्वनाच्वंम्ह पासायाके न्यन, “आह ! अलास, ह्वाट इज दिआन्सर ?” थःलिक्क च्वनाच्वंम्ह पासायात न्यन कि अलास, लिसः छु दु ? लिक्क च्वनाच्वंम्ह पासा अजू चाल । छाय्धाःसा न्ह्यसः हे मन्यसेंलि लिसः छु जुइ, तर सीत्यंम्हेसित थथे धायेगु नं मल्वल कि न्ह्यसः छु खः । छुं लिसः मवसेंलि व सीत्यंम्ह मिसां हाकनं न्यन, “इन दैट केश, ह्वाट इज द क्वेश्चन ?” यदि न्ह्यसः मस्यू सा उगु अवस्थाय् लिसः म्हमस्यूसा उगु अवस्थाय् न्ह्यसः छु खः । तर न्ह्यसः छु खः धइगु हे बांलाक्क मस्यू उकिं दकलय् न्हापां जिं लिसः बी न्ह्यसः पाय्छिकथं छिं थुइके फयेमा । हू इज प्रोगेसिव ? सु खःप्रगतिशील ?
न्हापांगु खँ, रुढीवादी सु खः ? हू इज आर्थोडक्स ? थुकियात कने तसकं अःपु । अर्थोडक्स छगू ल्वहं थें खः । ग्यसु नं दु वयाके, ठोसपन नं दु वयाके । अतीतयाइतिहास नं दु वयाके, रुपरेखा नं दु । ल्हातय् नं ज्वनेफु, थथे जूगुलिं इतिहास न्ह्याबलें तय दु कि रुढिवादी सु खः? आर्थोडक्स सु खः? तर प्रगतिशील सु खः – हू इज प्रोग्रेसिव ? फय् थें च्वं थ्व खँ ! न गुगुं आकार दु, न गुगुं रुपरेखा, अले फय्यात गुलि क्वात्तुक्क ज्वनेत स्वइ उलि हे म्हुलं पिने लाइ । अले गुखुनु प्रगतिशीलयात ज्वने फइ उखुनु व प्रगतिशीलता अर्थोडक्स जुइधुंकी । अथेजूगुलिं ज्वनेफइ । यदि परिभाषा याये फत कि सु खः प्रगतिशील, यदि थ्व ज्वने फत, यदि थ्व म्हुलय् बन्द जुल धाःसा थुइकादिसँ प्रगतिशील सी धुंकल । अर्थोडक्स हे जक ज्वने फइ । व डिफाइनेबल जुइ, वया व्याख्या यायेफइ ।
प्रगतिशीलया अर्थ हे थ्व हे खः कि गुकिया गुगुं सम्बन्ध अतितलिसे मदु, भविष्यलिसे दु । भविष्य आःबूगु मदुनि । गुम्ह बुइ धुंकल वयागु बारे निश्चित जुइफइ कि व छु खः अले गुकिया सम्बन्ध भविष्यलिसे दु वयागु सम्बन्धय् वयागु सम्बन्धय् यक्व निश्चित जुइमखु कि व छु खः । छाय्कि वया सम्बन्ध अनबर्न
(मबूनिम्ह) लिसे दु, व गुम्हबूगु हे मदुनिवलिसे । झीसं छम्ह बुराम्हमनूया सम्बन्धय् निश्चित धाये फइकि व सु खः, छु खः । झीसं छम्ह मचायाबारे निश्चित जुयाः धाये फइमखु कि व छु खः छाय्कि मचाया सम्बन्धय् निश्चित धायेफइमखु कि व छु खः छाय्कि मचा आः जुइत्यंगु दु अले व गुखुनु जुइ धुंकी उखुनु मचा जुइमखु । उखुुनु व बुरा जुइधुंकी ।
उकिं प्रगतिशीलयात पाय्छिकथं ज्वनेत दकलय् थाकुगु खँ खः कि थ्व फय् थें खः । अले थुकिं हे मेगु छगू तःधंगु महत्वपूर्ण विचाः वयेफु, व थ्व कि विश्वय् गुलि अर्थोडक्सीत दु, गुगुं इलय् उपिं सकलें प्रगतिशील खः । बुद्ध थःगु इलय् प्रगतिशील खः तर गुखुनु ज्वनेफत उखुनु अर्थोडक्स जुल । महावीर थःगु इलय् प्रगतिशील खः तर जैन प्रगतिशील मखु । उमिसं महावीरयात ज्वनेधुंकूगु दु, महावीर कुने धुंकूगु दु, म्हू बन्द जुइधुंकूगु दु । जीसस क्राइस्ट थःगु जमानाय् प्रगतिशीलखः । ईसाई, प्रगतिशील मखु । क्राइस्ट म्हुलिइ, ज्वने धुंकूगु दु । गुगु इलय् नं प्रगतिशीलय् म्हुलिइ बन्द जुइ, उगु इलय् रुढि ब्वलनी, उगु इलय् परम्परा बुइ । थथे जूगुलिं न्हापांगु कठिनाई छितः स्पष्ट यानाबी कि प्रगतिशील शब्द इनडिफाइनेबल खः, थुकिया ब्याख्या जुइफइमखु । खः, उकिया व्याख्या थुकथं हे जुइफइ गथे झीसं स्वास्थ्यया व्याख्या यायेफइ ।

सफू पाखें

Categorized in बिचा: