nepal life 2076 3 18

Error message

Deprecated function: The each() function is deprecated. This message will be suppressed on further calls in _menu_load_objects() (line 579 of /home/newahub/public_html/includes/menu.inc).

सुष्मा स्वराज : भाजपाया छगः थां

नेवा: अनलाइन न्युज – ललेन्द्र शाक्य | २०७६ श्रावण २२, बुधबार १२:३९:४७

सर्वसाधारणया पासपोर्ट दयेकाः बिइत ग्वाहालि यायेगुनिसें विदेशय् अलपत्र लानाच्वंपिनिगु उद्धार यायेगुतक ज्या याःम्ह भारतीय नेतृ सुष्मा स्वराज मंगलवाः बहनी आकाझाकां मन्त ।
मदुम्ह सुष्मा स्वराज प्रखर वक्ता व कुशल प्रशासक खः । छगू इलय् ला भारतीय जनता पार्टीया लोकप्रिय वक्ताया रुपं अटल विहारी वाजपेयी लिपा सुष्मा स्वराजया नां वइगु खः । संसद जुइमा या सतक सुष्माया हे चर्चा जुइगु खः ।

वंगु प्यंगू दशकय् स्वराजं ११ गू चुनाव ल्वात, गुकी प्यक्वःतक विधानसभाय् विजयी जुल । न्हयक्वःतक सांसद जुल । स्वराज चुनावी राजनीतिइ हरियाणा, दिल्ली, उत्तरप्रदेश, मध्यप्रदेश, कर्नाटक व झारखण्ड यानाः खुगू राज्यय् सक्रिय जूगु खः ।

भारतीय प्रम नरेन्द्र मोदीया प्रशंसक व आलोचक सुष्मा

राजनीतिक विश्लेषकपिन्सं धायेगु याः, सन् २०१३ य् नरेन्द्र मोदीयात प्रधानमन्त्रीया उम्मेदवार घोषणा यायेमज्यू धकाः लालकृष्ण आडवाणीया मतय् सुष्मां नं आडवाणीयात लिपांगु ईतक साथ ब्यूगु खः । तर, सन् २०१४ या चुनावय् मोदीं त्याकल । जानकारीपिं व मोदीया आलोचकपिन्सं धाःगु खः, सुष्मां उकिया सजाय भविष्यय् फ हे फइतिनि ।

तर, अजूचायापूगु खँ, छु जुल धाःसा मोदीया हे प्रधानमन्त्री कालय् सुष्मा विदेशमन्त्री जुल । मोदी पक्षया गुलिखे भारतीय नेतापिन्सं धाःगु दु, मोदीं सुष्मायात विदेशमन्त्री दयेकाः बैगुनीयात गुनं स्यात । इन्दिरा गान्धीलिपा भारतीय विदेशमन्त्री जूम्ह निम्हम्ह मिसाया धलखय् सुष्माया नां अंकित जुल । अय्सां मोदीया निक्वःगु कार्यकालय् धाःसा सुष्मा स्वराज मन्त्री मजुल ।

जीवनया लिपांगु इलय् सुष्मां प्रधानमन्त्री मोदीप्रति अतिकं सम्मन भाव प्वंकाः ट्वीट याःगु खः । वं काश्मिरबारे प्रधानमन्त्री मोदीं याःगु निर्णयप्रति लक्षित यासें सुष्मां धाःगु दु, छितः अभिनन्दन याये चाहेजू । जि जीवनया थ्वहे दिं पियाच्वना ।

अटल विहारी बाजपेयीया पालय् सुष्मा न्हापांगुखुसि केन्द्रीय मन्त्री जूगु खः । सुरु सुचं व प्रसारण मन्त्रालय कःघाःम्ह सुष्मां लिपा परिवार कल्याण मन्त्रालयया जिम्मेवारी काःगु खः ।
पासपोर्ट दयेकाः बिइगु, विदेशं उद्धार यानाबिइगु सुष्माया ज्या

सुष्मा स्वराजं थः विदेशमन्त्री जूबलय् संयुक्त राष्ट्रसंघया महासभाय् हिन्दी भासं भाषण याःगु खः । हिन्दीं भाषण यायेधुंकाः स्वराजया अतिकं प्रशंसा जूगु खः ।

विदेशमन्त्री जूबलय् सुष्मा स्वराज ट्वीटरय् आपालं सक्रिय जुइगु खः । विदेशय् अलपत्र लाःपिनिगु उद्धार यायेगुलि जुइमा वा पासपोर्ट दयेकाः बिइगु ज्या जुइमा सुष्मां नुगः चायेकाः ग्वाहालि याइगु खः । सुष्माया सहयोगी भावना खनाः जुइ गुलिस्यां ट्वीटरय् सुष्मा स्वराजयात मेन्सन यासें अतिकं सामान्य खँय् नं ग्वाहालि फ्वनीगु खः । उज्वःगु कथंया आग्रहयात सुष्मां ख्याः यायां तंकाः छ्वइगु खः ।

मनमोहनविरुद्ध उत्तेजक अभिव्यक्ति

यूपीए सरकारय् दुबलय् भाजपा प्रतिपक्षय् दूगु खः । सरकारया भ्रष्टाचारया खँ सार्वजनिक जुयातुं च्वनीगु खः ।

उगु इलय् लोकसभाय् विपक्षी नेताया रुपं सुष्मा स्वराज ग्यानापुक्क हे न्ह्यज्याइम्ह खः । उकिं धाइगु खः, भाजपायात सत्ताय् हयेत सुष्माया तःधंगु योगदान दु ।

छक्वः तत्कालीन प्रधानमन्त्री मनमोहन सिंहयात सुष्मां संसदय् हे उत्तेजक जुसें धाःगु खः, छं थुखेउखे खँ ल्हायेमते । थ्व खँ धाः कि रक्षा दल गुलि लुटेजुल ?

उकिया छुं दिं लिपा नं थ्वहे प्रसंगय् सुष्मां धाःगु खः, जिं धाये रक्षा दलय् लुट छाय् जुल, छाय् धाःसा छंगु लुटेरापिन्त पोसेयायेत खः ।

सोनिया प्रधानमन्त्री जूसा भिक्षुणी जुइ : सुष्मा स्वराज

सुष्मा स्वराजं थुगु हे दँया अप्रिल महिनाय् नं कांग्रेस आईया नेता राहुल गान्धीप्रति कटाक्ष याःगु खः । वं धाःगु दु, गुगु छेँजःया निम्ह निम्ह दुजः आतंकवादया शिकार जुल, वहे छेँजःया काय् नं धयाच्वंगु दु आतंकवाद छुं मुद्दा मखु । राहुल जी, यदि आतंकवाद छुं मुद्दा मखुसा छिं सुरक्षा टोली छाय् तयागु खः ?

सन् १९९९ स चुनावया ई खः । सोनिया गान्धीं कांग्रेसया नेतृत्व कःघाःगु थ्यंमथ्यं दच्छि दूगु खः । २९ अक्टुबर १९९९ स सोनिया गान्धीं उत्तर प्रदेशया अमेठी व कर्नाटकया बेल्लारी निगू थासं लोकसभा चुनाव ल्वायेगु घोषणा यात ।

भाजपां सोनिया गान्धीयात ख्याच्वः बिइत सुष्मा स्वराजयात बेल्लारी क्षेत्रय् उम्मेदवार दयेकल । बेल्लारी कांग्रेसया गढ खः । सुष्मा सोनियालिसे ५६ हजार मत अन्तरं पराजित जुल । उगु इलय् चुनावी भाषणय् सुष्मां धाःगु खः, यदि सोनिया गान्धी प्रधानमन्त्री जुल धाःसा जिं सँ खानाः, तुयुगु सारी सिने, भिक्षुणी जुयाः बँय् देने ।

न्हापा बाजपेयी व वधुंकाः नरेन्द्र मोदीया न्हापांगु कार्यकालय् केन्द्रीय मन्त्री जूम्ह सुष्मा भाजपाया छगः थां सरह खः । देसया मिसापिन्त संगठनय् स्वायेगु अभूतपूर्व ज्या याःगु ‘जस’ नं सुष्मा स्वराजयात बिइगु याः । विदेशमन्त्री जूबलय् पाकिस्तानया नागरिकपिन्त तकं उद्धार यात, गुकिं इपिं भारतय् वया ढुक्क जुया आराम यायेखन ।

Categorized in अन्तर्राष्ट्रिय