ad 2076 5 18

सिभिल बैंक ः रञ्जना लिपिलिसें म्हसीका बोर्ड

नेवा: अनलाइन न्युज | २०७६ आषाढ २०, शुक्रबार १५:३२:००

‘समृद्धिया नितिं सिभिल बैंक’ धैगु नारा थ्वयेकाः न्ह्यज्यानाच्वंगु सिभिल बैंकं नेपाली बैंकतमध्ये हे दकले न्हापांगुखुसि नेपाःया मौलिक रञ्जना लिपिया छ्यलाबुला यानाः आधिकारिक म्हसीका बोर्डया छ्यलाबुला सिभिल बैंकया यल दौबहाःया शाखां प्रारम्भ याःगु दु ।

उगु शाखाया उलेज्या वाङमय शताब्दी पुरुष संस्कृतिविद् डा. सत्यमोहन जोशीं यानादीगु खः ।

शाखाया उलेज्या समारोहया सभापतित्व सिभिल बैंकया नायः ईं इच्छाराज तामाङं यानादीगु खःसा मूपाहाँ कथं वाङमय शताब्दी पुरुष सत्यमोहन जोशी झायादीगु खः ।

उगु ज्याझ्वलय् विशिष्ट पाहाँया रुपं यल महानगरपालिकाया मेयर चिरिबाबु महर्जन, सिभिल बैंकया प्रमुख कार्याकारी अधिकृत गोविन्द गुरुङ व मेमेपिं विशिष्ट पदाधिकारीपिं, यल उद्योग वाणिज्य संघया पदाधिकारीपिं, उगु क्षेत्रया राजनीतिक व्यक्तित्वपिं, उद्योगी, व्यवसायी, गन्यमान्य व्यक्तिलिसें सर्वसाधारणपिनिगु आपालं उपस्थिति दूगु खः ।

उगु ज्याझ्वःया विशिष्ट पाहाँ यल महानगरपालिकाया मेयर चिरिबाबु महर्जनं यलया दौबहाः क्षेत्रया अप्वःगु आर्थिक गतिविधियात सिभिल बैंकं थप उर्जा प्रदान याइगु खँ प्रष्ट यानादिलसा रंजना लिपि लिसेंया म्हसीका बोर्डं थःत थप लसता जूगु खँ नं कनादिल ।

अथेहे, ज्याझ्वःया मूपाहाँ वाङमय शताब्दी पुरुष सत्यमोहन जोशीं नेपाःया बैंकिङ्ग इतिहासया बःचाधंगु म्हसिकालिसें सिभिल बैंकया उत्तरोत्तर प्रगतिया कामना यानादिल ।

सिभिल बैंकया प्रमुख कार्यकारी अधिकृत गोविन्द गुरुङं थः ग्राहकवर्ग व मेमेपिं सकल सरोकारवालापिनिगु हितयात ध्यानय् तयाः बचत परिचालनया योजनात हयेगु व स्थानीय अर्थतन्त्रया विकासया नितिं उत्पादनमूलक क्षेत्रया लगानीइ बः बिइगु लिसें प्रविधि केन्द्रीत सेवा सुविधायात परिस्कृत यानाः यंकेगु व थःपिनिगु पहुँचयात विस्तार यानाः व्यवसाय अभिबृद्धि यानाः यंकेगु खँ कनादीगु खः ।

Categorized in बजाः