सिद्धिदास महाजुया बुदिंया लसताय् मैनमत याः
नेवा: अनलाइन न्युज – निश्चल | २०७६ भाद्र २९, आइतबार १७:०४:१९
महाकवि सिद्धिदास महाजुया १५२ क्वःगु बुदिंया लसताय् सिद्धिदास स्मृति समाजं सोमवाः सनिलय् मैनमत याः याइगु जूगु दु ।
स्मृति समाजं दँय् दसं येँया भोताहिति व रत्नपार्क दुपातय् पलिस्था यानातःगु महाकवि सिद्धिदास महाजुया झ्वाता लागाय् मुनाः मैनमत याःया ज्याझ्वः न्ह्याकाः वयाच्वंगु खः ।
सिद्धिदास महाजु स्मृति समाजया छ्याञ्जे दीपक तुलाधरं नेवाः अनलाईनन्यूजयात बियादीगु जानकारी कथं कन्हय् सोमवाः सिद्धिदास महाजुया झ्वाता पलिस्था यानातःगु लागां तःजिकं मैनमत याः यायेत्यनागु जानकारी बियादीगु दु । लिसें भाजु तुलाधरं उगु ज्याझ्वलय् ब्वति कायेत सकलसित इनाप नं यानादीगु दु ।
कन्हय् सोमवाः जुइगु मैनमत याःया लँपु रत्नपार्क, भोताहिति, असं, वंघः, मखं, मरुसतः, चिकंमू, न्हूघः, भिन्द्यःत्वाः जुयाः प्याफः, न्यत, थायमदु, असं जुयाः रत्नपार्क थ्यंकाः क्वचायेकीगु ज्याझ्वः तयातःगु दु ।
