ad 2076 5 18

सिंहदरबारय् सिनाच्वंम्ह नायब सुब्बाया ‘सुसाइड नोट’ लुयावल

नेवा: अनलाइन न्युज | २०७६ भाद्र ३, मंगलबार १७:२१:३१

मुलुकया मु प्रशासनिक केन्द्र दुने हे सिनाच्वंगु अवस्थाय् लुयावःम्ह कर्मचारीं आत्महत्या याःगु सीदूगु दु ।

राष्ट्रिय योजना आयोगया नायब सुब्बा बच्चु केसी ज्याकुथिइ हे सिनाच्वंगु अवस्थाय् लुयावःगु खः । वं च्वयातःगु सुसाइड नोट प्रहरीं लुइकूगु दु । आत्महत्या याःम्ह केसी किपू नगरपालिका दुनेया तौदहया बासिन्दा खः धकाः जानकारी ब्यूगु दु ।

अपराधस्थलय् खटेजूम्ह छम्ह अधिकृतया कथं, सुसाइड नोटय् कलाःया नां कयाः ‘म्हो जक अंश कायेखन धकाः चिन्ता कायेमते’ धयातःगु दु ।

सुसाइड नोटय् थःम्हं सुंयागु हुनिं आत्महत्या यानागु मखु, पत्रकार वा मेमेपिन्सं मेगु अर्थं कायेमते धकाः नं च्वयातःगु दु ।

घटनास्थलय् थ्यंकूम्ह सिन अफ क्राइम (सोको) अफिसरं आत्महत्या याःम्ह बच्चु केसीया सुसाइड नोट मुंकूगु खः । उकियात परीक्षणया नितिं प्रहरीया केन्द्रीय विधि विज्ञान प्रयोगशालाय् यंकूगु दु ।

केसीया सीम्ह लुयावःगु थाय् लिक्क वा, छ्वया बालीइ छ्यलीगु छगू कथंया किटनाशक वासःया खोल लुयावःगु दु । वासःलिसें केराया खोला नं लुयावःगुलिं वं केराय् ल्वाकछ्यानाः विष त्वंगु आशंका याःगु दु ।

केसीया मृत्युबारे थप अनुसन्धान जुयाच्वंगु येँ प्रहरी परिसर टेकुं जानकारी ब्यूगु दु ।

Categorized in दुर्घटना-अपराध