ad 2076 5 18

सांसदं कृष्ण भगवानया प्रेरणा धासें ५८ म्ह कलाः ब्याहा यात !

२०७५ श्रावण ८, मंगलबार ११:३३:५४

न्याक्वःतक सांसद व मन्त्री तं जुइधुंकूम्ह छम्ह मनुखं जीवनय् ५८ म्ह मिसापिंलिसे ब्याहा यात धैगु खँ न्यनेबलय् अजू चायेफु । तर बागुन सुम्ब्रुइ नांया उम्ह मनुखं धाःसा आपालं सांसद व मन्त्रीपिन्सं यायेमफूगु ज्या याःगु दु । वं थःगु जीवनकालय् ५८ म्ह कलाः ब्याहा यात । वं थुलिमच्छि कलाः दयेकल कि जीवनया अन्तिम इलय् तक थ्यंबलय् वयात थः फुक्क कलाःपिनिगु नां तकं याद मदु ।

थुज्वःगु कीर्तिमानी सांसया वंगु जुन २२ तारिखय् मृत्यु जूगु दु । भारतण झारखण्ड राज्यया न्हापांगु विधानसभा उपाध्यक्ष बागुन सुम्ब्रुईया नकतिनि जक ९६ दँया उमेरय् मृत्यु जूगु दु । कलाःया धनी उम्ह पूर्वमन्त्री व पूर्व सांसद अतिकं सादा जीवन हनीम्ह खः । तापाला जुइमा बाय् चिकुला, म्हय् केवल धोति जक पुनीगु याइम्ह खः ।

जीवनय् आपालं मिसापिंलिसे ब्याहा याःगुया छगू कारण धयाच्वनी वं । भगवान श्रीकृष्णया प्रेरणां वं न्यागू दर्जन गोपिनी दुत हयागु खः हँ अरे । तर कृष्णं थें शोषित पीडित मिसापिनिगु उद्धार यानाः थःम्हं कलाः दयेकाःगु दाबी उम्ह मनुखं याःगु दु । थःगु शरणय् वइपिं हरेक मिसापिन्त थःम्हं सदां साथ बियागु व कलाः दयेकाः तयागु उम्ह मनूया धापू खः ।

वया कथं न्हापा न्हापा झारखण्डय् जुइगु हाटतय्के वइपिं व्यापारीपिन्सं आदिवासी मिसापिन्त शोषण यानाः प्वाथय् दयेकीगु याइगु खः । म्हमस्यूपिं व्यापारीपाखें प्वाथय् दयाः अलपत्रय् लाःपिं मिसापिन्त वं साथ बिइगु याइगु खः व कलाः दयेकाः तइगु खः ।

उकथं सहारा बियाः गुलिखे मिसापिं उम्ह मनूलिसे जीवंकाछि कलाः जुयाः च्वन सा गुलिखे मिसापिं मन मिलेजूपिं मेपिं मिजंत नापलानाः पय्नं नं वन ।

जीवनय् आपालं मिसा वल व वन नं । उकिं उम्ह मनुखं सुं मिसा थःगु जीवनय् वइगु व त्वःताः वनीगु खँप्रति छुं च्यूताः मतल । अले वये वनीपिं फुक्क मिसापिनिगु नां लुमंकेगु नं त्वःतल ।

लुमंकेबहःजू, बागुनं लिपांगुखुसि सन् २००४ य् विधानसभाय् चुनाव त्याकूगु खः । तर वधुंकाः स्वास्थ्यय् खराबी वयेधुंकाः वं चुनाव मल्वात व राजनीतिपाखे तापात ।

एजेन्सी