समेबजि रेष्टुरेन्टय् राजेश व सुविनया न्यू इयर ईभ म्यूजिकल नाईट
नेवा: अनलाइन न्युज – ललेन्द्र शाक्य | २०७६ पौष १५, मंगलबार १४:५२:४२
किपूया ९ वडा नगां च्वय् छुगांया पिपलबोट राराहिल स्कूल लाईनय् पलिस्था यानातःगु समेबजि दः नेवाः रेष्टुरेन्टय् सन् २०२० न्हूदँया लसताय् सुमधुर संगीत सन्ध्याय न्यू इयर ईभ म्यूजिकल नाईट जुइगु जूगु दु ।
न्हूदँया छन्हु न्ह्यः अर्थात् डिसेम्बर ३१ तारिख (पुस १५ गते) मंगलवाः उगु रेष्टुरेन्टय् न्हिनय् ४ ता ईनिसें बहनी ९ ता ईतक उगु सांगितिक ज्याझ्वः जुइगु जानकारी रेष्टुरेन्ट संचालकपिं कलाकार चन्डेश्वर महर्जन व बेखाराम महर्जनं नेवाः अनलाईनन्यूजयात बियादीगु दु ।
किपूया नांजाःपिं म्येहालामिपिं राजेश महर्जन नेवाः व सुविन श्रेष्ठ निम्हेस्यां न्यू इयर ईभ म्यूजिकल नाईटय् म्ये व संगीत न्ह्यब्वइगु जानकारी बिसें रेष्टुरेन्ट संचालकपिन्सं नेवाः नसात्वसाया लिसें थीथी परिकारया सवाःनापं सांगितिक माहोलय् भेलेपुनेगु लकसया व्यवस्था यायेगु जानकारी बियादीगु दु ।
उगु ज्याझ्वलय् म्येहालामिपिं राजेश महर्जन नेवाः व सुविन श्रेष्ठपिन्सं नेपालभाषाया म्येलिसें खसः नेपाली भाय् व हिन्दी भाषाया सुमधुर संगीत न्ह्यब्वइगु जानकारी नं ब्यूगु दुसा ग्वसाः खलः समेबजि दः नेवाः रेष्टुरेन्टं उगु ज्याझ्वलय् दुहाँ वयेत निःशुल्क टिकटया ब्यवस्था जूगु धासें सकल संगीतह्यःमि व नेवाः नसात्वसाह्यःमिपिन्त सहभागीताया नितिं इनाप याःगु दु ।
