nepal lifef 2076 8 8

सत्तारुढ व विपक्षी सहमति लिक्क ः मिडिया काउन्सिल विधेयकय्

नेवा: अनलाइन न्युज | २०७६ श्रावण २८, मंगलबार १७:१८:४६

मिडिया काउन्सिल विधेयकय् सत्तारुढ व प्रमुख विपक्षी दल सहमति लिक्क थ्यंगु दु ।

प्रधानमन्त्री व सत्तारुढ नेपाल कम्युनिष्ट पार्टी (नेकपा)या नायः केपी शर्मा ओली व विपक्षी दल नेपाली कांग्रेसया सभापति शेरबहादुर देउवा दथुइ सहलह जुइधुंकाः थुकिं पूर्णता काइ ।

राष्ट्रियसभा नायः गणेश तिमिल्सिनाया पहलय् संचारमन्त्री गोकुल बास्कोटालिसें राष्ट्रियसभाय् दूगु दलया प्रतिनिधिपिं दथुइ थुगु विषयस सोमवाः सहलह जूगु खः ।

बैठकय् सत्तारुढ नेकपा राष्ट्रियसभा संसदीय दलया नेता दिनानाथ शर्मां मिडिया काउन्सिल विधेयक आवश्यक संशोधन यायेत थःगु दल तयार जूगु धाःगु दु ।

शर्मां धाःगु दु, “प्रेस स्वतन्त्रता, मिडिया काउन्सिलया स्वायत्तता व दण्ड जरिवानाबारे गुगु सरोकार व्यक्त जूगु दु, उकियात संशोधन यायेत तयार दु धकाः झी प्रमुख सचेतकं लिखित रुपं ब्यूगु दु ।”

संचारमन्त्री बाँस्कोटां दलत दथुइ जुइगु सहमतियात सरकारं सकारात्मक रुपं कायेगु धाःगु दु ।

कांग्रेसं मन्त्रीया बचन सकारात्मक जूगु तर, प्रधानमन्त्रीपाखें हे प्रतिबद्धता वयेमाःगु धारणा तःगु खः । राष्ट्रियसभाय् कांग्रेस संसदीय दलया नेता सुरेन्द्र पाण्डें धाःगु दु, “मिलेमजूगु विषय भिंकेगु प्रतिबद्धता प्रधानमन्त्रीपाखें नं वयेमाः ।”

प्रधानमन्त्रीं विपक्षी दलया नेता शेरबहादुर देउवालिसे सहमति यायेखतं विधेयक न्ह्यःने वनीगु निगुलिं दलया नेतापिन्सं धाःगु दु । नेता शर्मां धाःगु दु, “थौंकन्हय् हे प्रधानमन्त्री व पूर्वप्रधानमन्त्रीदथुइ खँल्हाबल्हा जुइधुंकाः विधेयक न्ह्यःने वनी ।”

सरकारं राष्ट्रियसभाय् दर्ता याःगु मिडिया काउन्सिल सम्बन्धी विधेयक विवादित दु । काउन्सिलया स्वायत्तता खोसेयायेगु, पत्रकारपिन्त १५ लखतक दण्ड जरिवाना यायेगु थेंजाःगु प्रावधान तयाः विधेयक हयेधुंकाः नेपाल पत्रकार महासंघ आन्दोलनय् हे क्वाहाँ वःगु खःसा प्रमुख विपक्षीं नं विधेयकया विरोध याःगु खः ।

Categorized in राजनीति