शताव्दी पुरुष जोशीयात ४ लख राशीया ‘पृथ्वी प्रज्ञा पुरस्कार’
नेवा: अनलाइन न्युज | २०७६ मङ्सिर ३०, सोमबार १४:२४:००
राष्ट्रपति विद्यादेवी भण्डारीपाखें वाङमय शताव्दी पुरुष डा. सत्यमोहन जोशी सम्मानित जुयादीगु दु ।
नेपाल प्रज्ञा प्रतिष्ठानं प्यदँय् छक्वः लःल्हाइगु राज्यया हे सर्वाधिक गरिमामय पुरस्कार पृथ्वी प्रज्ञा पुरस्कारपाखें वाङमय शताव्दी पुरुष जोशी सम्मानित जुयादीगु खः ।
राष्ट्रपति भण्डारीया ल्हाःतं डा. जोशीयात पुरस्कारया राशी ४ लख तका दांलिसें दोसल्ला न्ययेकाः हनापौ लःल्हाःगु खः ।
राष्ट्रपति भवन शीतल निवासय् ग्वसाः ग्वःगु उगु समारोहय् राष्ट्रपति भण्डारीं डा. जोशीइात सरकारीस्तरपाखे. लःल्हाइगु देसया हे सर्वाधिक राशी व गरिमाया पृथ्वी प्रज्ञा पुरस्कार लःल्हाःगु उगु समारोहय् नेपाल प्रज्ञा सामाजिक शास्त्र–संस्कृति–दर्शन पुरस्कार प्रा.डा. त्रिरत्न नारायण मानन्धरयात लःल्हाःगु खः । प्रत्येक निदँय् छक्वः लःल्हाइगु उगु पुरस्कारया राशी १ लख तका दांलिसें दोसल्ला व हनापौ दुथ्याः ।
अथेहे, नेपाल प्रज्ञा भाषा पुरस्कार प्रा.डा. टंकप्रसाद न्यौपानेयात लःल्हाःगु खः । प्रत्येक निदँय् लःल्हाइगु उगु पुरस्कार दुने राशी १ लख तका दांलिसें दोसल्ला व हनापौ दुथ्याः ।
ज्याझ्वलय् नेपाल प्रज्ञा नेपाली साहित्य पुरस्कार (२०७५) मदन रेग्मी, नेपाल प्रज्ञा नेपाली साहित्य पुरस्कार ९२०७६० भागीरथी श्रेष्ठ, नेपाल प्रज्ञा मातृभाषा साहित्य पुरस्कार ९२०७५० पहाडी व हिमाली क्षेत्रय् न्वःवाइगु मातृभाषा साहित्यया नितिं अमर तुम्याहाङ, नेपाल प्रज्ञा मातृभाषा साहित्य पुरस्कार ९२०७५० तराई–मधेशय् न्वःवाइगु मातृभाषा साहित्यया निति. अयोध्यानाथ चौधरी, नेपाल प्रज्ञा मातृभाषा साहित्य पुरस्कार ९२०७६० पहाडी व हिमाली क्षेत्रय् न्वःवाइगु मातृभाषा साहित्यया नितिं अमृत योञ्जन तामाङ व नेपाल मातृभाषा साहित्य पुरस्कार (२०७६) तराई व मधेसय् न्वःवाइगु मातृभाषा साहित्यया नितिं अशोक थारुयात लःल्हाःगु खः ।
उगु न्यागुलिं पुरस्कार दुने राशी १–१ लख नगद, दोसल्ला व हनापौ दु । वहे समारोहय् राष्ट्रपति भण्डारीं नेपाल प्रज्ञा प्रतिष्ठानपाखें ग्वसाः ग्वःगु राष्ट्रिय कविता महोत्सव–२०७६ या उत्कृष्ट कविपिन्त सिरपाः लःल्हाःगु खः ।
महोत्सवय् न्हाप जूम्ह धादिङया हेम प्रभासयात ३० हजार नगद, ल्यू लाःम्ह डोटीया सुभाषचन्द्र भण्डारीयात २५ हजार तका, लियांल्यू लाःम्ह लमजुङका प्रज्वल अधिकारी, सोलुखुम्बुया शान्ति शर्मा व येँया प्रकाश बस्नेत गफाडीयात म्हतिं २० हजार तका, हनापो व पदक लःल्हाःगु खः ।
हनापौ, सिरपाः लःल्हायेधुंकाः समारोहयात सम्बोधन यासें राष्ट्रपति विद्यादेवी भण्डारीं वाङमय क्षेत्रया उन्नयनया नितिं हनेज्या व सिरपालं ग्वहालि याइगु धाःगु दु । राष्ट्रपति भण्डारीं धाःगु दु, “प्रकृति व संस्कृतिलिसे एकाकार यानाः साहित्य सिर्जना यानाः राष्ट्रियतायात मजबुद यायेफइ । राजनीतिक हिउपाःयात कला व साहित्यं ऊर्जा बिइमाः, प्राचीन संस्कृति कुबियातःगु स्वाधीन मुलुकय् सुदृढ सहिष्णुता दु, उकियात कायम यानातयेत साहित्य क्षेत्रं योगदान यायेमाः ।”
ज्याझ्वलय् संस्कृति, पर्यटन व नागरिक उड्डयनमन्त्री योगेश भट्टराई न. पूर्वीय सभ्यतां एकताया हसना (सन्देश) ब्यूगुलिं आपालं पंगःतपाखे. मुलुक बचेजुयाः वयाच्वंगु धाःगु दु । १२३ भाषा, थीथी धर्म व संस्कृति दूगु नेपाली राष्ट्रियतापाखे. संगठित जूगु मन्त्री भट्टराई नं न्ह्यथंगु दु ।
नेपाल प्रज्ञा प्रतिष्ठानया कुलपति गंगाप्रसाद उप्रेतीं थुगु वाःदुने महाकवि लक्ष्मीप्रसाद देवकोटाया निवासयात संग्रहालयया रुपं रपान्तरण यायेगु अभियान न्ह्याइगु जानकारी ब्यूगु दु । कुलपति उप्रेतीं प्रज्ञा पुरस्कार व कविता महोत्सव पुरस्कारया गरिमाबारे न्ह्यथंगु खः ।
समारोहस प्रज्ञा प्रतिष्ठानया उपकुलपति डा. जगमान गुरुङं लसकुस मन्तव्य ब्यूगु खः । प्रतिष्ठानया सदस्य सचिव प्रा. जगतप्रसाद उपाध्यायं प्रज्ञा पुरस्कार सम्बन्धी व प्राज्ञ परिषद दुजः, काव्य विभाग प्रमुख व कविता महोत्सवया कजि प्रा.डा. हेमनाथ पौडेलं राष्ट्रिय कविता महोत्सव–२०७६ सम्बन्धी प्रतिवेदन न्ह्यब्वःगु खः ।
समारोह वाङमय शताव्दी पुरुष सत्यमोहन जोशीं पुरस्कार काःबलय् थःगु अनुभूति प्वंकादीगु खः । पुरस्कृत कविपिन्सं थःथःगु कविता वाचन नं याःगु खः ।
Categorized in कला