ad 2076 5 18

विश्वकप छनोटया सुरुवाती ५ गू कासा नेपालं घरेलु मैदानय् मम्हितीगु

नेवा: अनलाइन न्युज | २०७६ श्रावण १५, बुधबार ११:२०:१०

दशरथ रंगशाला निर्माण मजूबलय् कुवेतयात लबः

मैदान अभावया हे हुनिं विश्वकप २०२२ छनोटया सुरुवाती ५ गू कासा नेपालय् मजुइगु जूगु दु । थथे जूबलय् कुवेतं लबः काइगु जूगु दु । कुवेतं होम एण्ड अवे निगुलिं कासा थःगु घरेलु मैदानय् म्हिते खनीगु जूगु दु ।

आः नेपाल फुटबल संघ (एन्फा)या मंगलवाः च्वंगु आकस्मिक बैठकं नेपाःया होम गेम सिबें न्ह्यः अवे गेमया व्यवस्था मिलेयायेत एसियाली फुटबल महासंघयात आग्रह याःगु दु ।

एएफसीं आः नकतिनि जक सार्वजनिक याःगु कासा धलः कथं नेपालं भाद्र १९ गते कुवेतलिसे व २४ गते चाइनिज ताइपेइलिसे थःगु हे घरेलु मैदानय् म्हितेमाः । तर नेपाःया दरशरथ रंगशालाया पुनःनिर्माण क्वमचाःनिगुलिं निगुलिं कासायात अवेलय् रुपान्तरण यायेत आग्रह यायेगु एन्फां निर्णय याःगु दु ।

वधुंकाः अष्ट्रेलियालिसे वया हे घरेलु मैदानय् २३ असोजय् म्हितेमाः नेपालं । २८ असोजय् जुइगु जोर्डनलिसे होम गेम म्हितेमाः । थुकियात अवेलय् रुपान्तरण यायेत आग्रह याःगु दु ।

मंसीर ३ गते कुवेतलिसे मेगु कासा दु । १९ भाद्रया होमयात अवेलय् रुपान्तरण याइबलय् उगु कासा नेपालय् जुइमाःगु खः ।

तर उगु ईतक नं रंगशाला तयार मजुइगु जूगुलिं उगु कासा नं कुवेतय् हे जुइगु जूगु दु । विश्वकप छनोटय् नेपालं कुवेतलिसेया निगुलिं कासा वया हे घरेलु मैदानय् म्हितीगु जूगु दु ।

वधुंकाःया स्वंगू कासा धाःसा नेपालय् जुइ । एसीसीया धलः कथं नेपालं १३ चैत्रय् चाइनिज ताइपेईलिसे म्हिती ।

१८ चैत्रय् अष्ट्रेलियां नेपाःलिसे येँय् म्हितीसा २२ जेठय् जोर्डनलिसे होम म्याच म्हिती ।

Categorized in कासा